Видео Марзи Тоҷикистону Қирғизистон Сиёсат

ЭМОМАЛӢ РАҲМОН СЕ МУОВИНИ ФАРМОНДЕҲИ ҚӮШУНҲОИ САРҲАДИРО ИВАЗ КАРД (10 АКС)

07/08/2023

0 616 3 дақиқа хондан

Президенти Тоҷикистон Эмомалӣ Раҳмон рӯзи 7 августи соли 2023 дар фармондеҳии Сарраёсати қӯшунҳои марзбонии Кумитаи давлатии амнияти миллии Тоҷикистон як силсила тағйироти кадрӣ ба амал бароварда, тақрибан ҳамаи муовинони фармондеҳи қӯшунҳои марзбониро иваз кард.

Аз ҷумла бо фармонҳои президент бо далели яксони “бо сабаби ба кори дигар гузаштан” Раҷабзода Насимҷон Холмурод аз вазифаи муовини якуми фармондеҳ ва сардори Сарситоди Қӯшунҳои сарҳадии КДАМ ҶТ, Хушвахт Кишваршо Султон аз вазифаи муовини фармондеҳи Қӯшунҳои сарҳадии КДАМ ҶТ ва Пиракзода Ҳикматулло аз вазифаи муовини фармондеҳи Қӯшунҳои сарҳадии КДАМ ҶТ – сардори Раёсати Қӯшунҳои сарҳадӣ дар вилояти Суғд озод карда шуданд. Ба кадом “вазифаи дигар” гузаштани Насимҷон Раҷабзода ва Кишваршо Хушвахт маълум нест, вале Ҳикматулло Пиракзода билофосилда бо як фармони дигари президент ба ҷои Насимҷон Раҷабзода муовини якуми фармондеҳ ва сардори Сарситоди Қӯшунҳои сарҳадии КДАМ ҶТ таъйин шудааст. Ҳамчунин бо фармонҳои президент аз 7 август Шоҳвализода Тоҷиддин Саид ба ҷои Кишваршо Хушвахт муовини фармондеҳи КДАМ ҶТ оид ба разведка ва Умарзода Умар Сафар ба ҷои Пиракзода, ки ба вазифаи болотар рафт, муовини фармондеҳи Қӯшунҳои сарҳадии КДАМ ҶТ – сардори Раёсати Қӯшунҳои сарҳадӣ дар вилояти Суғд таъин карда шуданд.

Ин тағйироти ҷиддии кадрӣ дар фармондеҳии қӯшунҳои марзбонии Тоҷикистон дар пайи як силсила ҳодисаҳои пурсарусадои таҳқиру латтукӯби навсарбозон аз ҷониби кӯҳнасарбозон ва чанд мавриди маргҳои мармузи сарбозон дар қисмҳои низомии нирӯҳои сарҳадӣ сурат гирифт. Ҳамин тавр, қӯшунҳои сарҳаддии Тоҷикистон дар пайи муноқишаи мусаллаҳонаи моҳи сентябри соли 2022 дар марз бо Қирғизистон, ки талафоти ҷониби Тоҷикистон аз талафоти ҷониби Қирғизистон бамаротиб бештар шуд, ба далели сатҳи омодагии нирӯҳояш зери оташи интиқодҳо қарор гирифта буд.

Аммо маълум нест, ки тағйироти кадрии рӯзи 7 август ба ин қазияҳо то куҷо рабт дорад?

Хадамоти матбуоти президент хабар дод, ки рӯзи 7 август дар дигар ҷузъу томҳои Қӯшунҳои сарҳадӣ низ тағйироти кадрӣ сурат гирифта, аз ҷумла сардорони отрядҳои сарҳадии вилояти Хатлон, ВМКБ, вилояти Суғд ва дигар воҳидҳои сохтории Қӯшунҳои сарҳадии Кумитаи давлатии амнияти миллиро фаро гирифта, ба ин вазифаҳои пурмасъулият афсарони ҷавону соҳибтаҷриба таъин гардиданд. Хадамоти матбуоти президент кадрҳои таъйиншударо “афсарони соҳибтаҷриба, хатмкардагони ду муассисаи олии ҳарбии Ҷумҳурии Тоҷикистон ва хориҷи кишвар ва дорои маҳорати хуби фармондеҳиву ташкилӣ, содиқу корозмуда” ном бурдааст.

Бино ба ин манбаъ, Эмомалӣ Раҳмон рӯзи 7 август дар Қасри миллат бо кадрҳои нави дар сохторҳои Қӯшунҳои марзбонӣ таъйиншуда мулоқот карда, бо дарназардошти вазъи печидаву мураккаб ва пешгӯинашавандаи минтақа ва ҷаҳон таъкид кардааст, ки ҳифзи сарҳади давлатӣ бояд тибқи низом ва санадҳои таъминкунандаи заминаҳои ҳуқуқӣ таъмин гардад ва ҳамагуна қонуншиканӣ дар сарҳад бояд бартараф карда шавад.

Хадамоти матбуоташ гуфт, ки Эмомалӣ Раҳмон “бо таҳлилу баррасӣ аз ҳодисаҳои дар сарҳад рӯйдода, аз ҷумла қочоқи маводи мухаддир, силоҳ, ҷинояткории муташаккил, убури ғайриқонунии сарҳад, муносибатҳои ғайриоинномавӣ, қочоқи молу маҳсулот ва пешгирӣ аз амалҳои террористиву гуруҳҳои муташаккили ҷиноии фаромиллӣ ба роҳбарияти Қӯшунҳои сарҳадӣ дастурҳои мушаххас додааст”.

ФАРМОНИ
ПРЕЗИДЕНТИ ҶУМҲУРИИ ТОҶИКИСТОН

Дар бораи аз вазифаи муовини Фармондеҳи Қӯшунҳои сарҳадии
Кумитаи давлатии амнияти миллии Ҷумҳурии Тоҷикистон – сардори
Раёсати Қӯшунҳои сарҳадӣ дар вилояти Суғд
озод намудани Пиракзода Ҳ.

Мутобиқи моддаи 69 Конститутсияи Ҷумҳурии Тоҷикистон фармон медиҳам :

Пиракзода Ҳикматулло бо сабаби ба кори дигар гузаштан аз вазифаи муовини Фармондеҳи Қӯшунҳои сарҳадии Кумитаи давлатии амнияти миллии Ҷумҳурии Тоҷикистон – сардори Раёсати Қӯшунҳои сарҳадӣ дар вилояти Суғд озод карда шавад.