МУРОФИАИ ЖУРНАЛИСТ ХУРШЕД ФОЗИЛОВ ПУШТИ ДАРҲОИ БАСТА ОҒОЗ ЁФТ
Мурофиаи рӯзноманигори муқими Панҷакент Хуршед Фозилов рӯзи 25-уми май дар боздоштгоҳи муваққатии шаҳри Хуҷанд таҳти раёсати раиси додгоҳи шаҳри Панҷакент пушти дарҳои баста шуруъ шуд. Хушбахт Фозилов, бародари Хуршед Фозилов, ба Радиои Озодӣ гуфт, ба мурофиа танҳо вакили мудофеъ ва ду шоҳид роҳ ёфтаанд. “Ба наздикон иҷозаи даромадан надоданд. Модару хоҳарам дар беруни боздоштгоҳ мунтазири баррасии қазия ҳастанд,” – афзуд ӯ.
Яке аз наздикони Хуршед Фозилов ба “Азия Плюс” гуфт, онҳоро расман ба мурофиа ҳатто даъват накарданд, вале вақте пеши бинои боздоштгоҳ рафтанд, нагузоштанд, ки дар мурофиа иштирок кунанд. “Танҳо вакили дифоъ ба мурофиа даромад, моро нагузоштанд. Сабабашро ҳам шарҳ надоданд. Пештар гуфта буданд ки мурофиа кушод мегузарад. Ҳоло пушти дари боздоштгоҳ мунтазир шиштем”, – гуфтааст ҳамсуҳбати “Азия Плюс”.
Қаблан, Дилафрӯз Самадова, вакили дифои Хуршед Фозилов бо ирсоли дархости расмӣ аз додрас хоста буд, ки мурофиа на дар дохили боздоштгоҳи муваққатии шаҳри Хуҷанд, балки дар бинои додгоҳи шаҳри Панҷакент ба таври озодона баргузор шавад ва наздикону пайвандонаш дар рафти он ширкат кунанд. Ин дархостро додрас рад кардааст.
Бархе нозирон муътақиданд, ки мақомот дар Тоҷикистон маъмулан дар сурати заиф будани далелҳояшон ба парвандаҳо муҳри махфӣ зада, пушти дарҳои баста баррасӣ мекунанд.
Хуршед Фозилов рӯзи 6 марти соли 2023 аз ҷониби кормандони шуъбаи КДАМ дар шаҳри Панҷакент дастгир шуда, ибтидо бо ҷурми гӯё “итоат накардан ба амри кормандони амният” ба 5 шабонарӯз ҳабси маъмурӣ маҳкум шуд ва сипас бо иттиҳоми “ҳамкорӣ бо созмонҳои мамнӯъ” ба зиддаш парвандаи ҷиноятӣ кушода, ӯро ба боздоштгоҳи Хуҷанд фиристоданд. Раёсати амнияти вилояти Суғд таҳқиқи парвандаи Хуршед Фозиловро рӯзи 10 май ба поён расонд.
Ба зидди Хуршед Фозилов бар асоси як банди Кодекси ҷиноятии Тоҷикистон: моддаи 307 иловаи 3, қисми 2 Кодекси ҷиноятӣ (ҳамкорӣ бо ҳизбу ҳаракатҳои фаъолияташон дар Тоҷикистон мамнӯъ) айб эълон шудааст. Ба ӯ бар асоси ин банди қонун аз 5 то 8 соли зиндон таҳдид мекунад.
Худи журналист ва наздиконаш ин иттиҳомро рад мекунанд. Хуршед Фозилов қаблан ба адвокаташ гуфта буд, ки ӯро бо роҳи фишор ва тарсондан водор кардаанд, ки ба зидди худаш баёноти бардурӯғ дода, иттиҳоми ҳамкорӣ бо созмонҳои мамнӯъро ба гардан бигирад. Ӯ тавассути адвокаташ ба додситонии вилояти Суғд аз боздошти ғайриқонунӣ ва худсаронаи худ, риоя накардани ҳаққи ҳифзи асрори зиндагии шахсӣ (водор кардан ба кушодани телефон) ва водор кардан ба додани баёнот ба зидди худаш ва ба гардан гирифтани гуноҳи нокарда шикоят карда буд. Маълум нест, ки оё додситонӣ ин шикоятро таҳқиқ кард ё на?
Модари ӯ Азиза Нӯъмонова ахиран, баъди ба додгоҳ рафтани парвандаи писараш ба президенти Тоҷикистон Эмомалӣ Раҳмон нома навишта, бори дигар ҳар навъ ҳамкорӣ доштани писараш бо созмонҳои мамнӯъро рад кард ва аз президент хост, ки парвандаи Хуршед Фозиловро таҳти назорати худ гирифта, барои озод кардани ӯ кумак кунад. Дастгоҳи иҷроияи президент то ҳол ба ин дархости модари Хуршед Фозилов посух надодааст.
Хуршед Фозилов, ки 37 сол ва 4 фарзанд дорад, журналист ва ҳомии ҳуқуқи инсон буд ва аз зодгоҳаш шаҳри Панҷакент асосан дар бораи мушкилоти мардуми водии Зарафшон гузориш менавишт. Ӯ дар гузоришҳояш бисёр вақт аз мақомоти маҳаллӣ танқид мекард.
Дар як соли охир Хуршед Фозилов алакай панҷумин журналисти тоҷик аст, ки бо иттиҳоми шубҳаовари “ҳамкорӣ бо созмонҳои мамнӯъ” ба паси панҷара кашида мешавад.Дар тобистони соли 2022 бо айни иттиҳом журналистони мустақили тоҷик Далери Имомалӣ, Абдуллоҳ Ғурбатӣ, Завқибек Саидаминӣ ва Абдусаттор Пирмуҳаммадзода дастгир шуданд. Далери Имомалӣ ба 10 сол, Ғурбатӣ ба 7 солу 6 моҳ ва дуи дигар ба 7 соли зиндон маҳкум гардиданд.
Ҳомиёни ҳуқуқ парвандаҳои зидди ин 5 хабарнигори тоҷик ва ҳамчунин ҳукмҳои тӯлонии журналистону блогерҳои зодаи Бадахшонро сиёсӣ ва интиқом барои фаъолияти касбии журналистиву блогериашон медонанд ва озодии онҳоро талаб доранд. Аз ҷумла 5 созмони байналмилалии ҳомии ҳуқуқ рӯзи 24 март дар изҳороти муштараки худ ин мавридҳоро “бахше аз саркӯби дигарандешӣ дар Тоҷикистон” унвон карда, аз ҳукумати Тоҷикистон талаб карданд, ки журналист ва ҳомии ҳуқуқ Хуршед Фозиловро билофосила озод ва таъқиби журналистикаи мустақилро бас кунад.
Душанбе то ҳол ба ин даъватҳо ягон посух надодааст. Тоҷикистон имсол дар раддабандии ҷаҳонии озодии матбуот аз ҷумла ба далели ҳабси журналистону блогерҳо боз як зина поён рафта, дар байни 180 кишвар дар зинаи 151 қарор гирифт.