ДАСТ БА ҚАЛЛОБӢ ЗАДАНИ ДУ ПЕШСУДШУДА ВА ДУЗДӢ АЗ ТАРАБХОНАИ “КИШ-МИШ”
Аз навори хабарҳои маркази матбуоти ВКД Тоҷикистон аз 19.05.2023
Оғоз гардидани парвандаи ҷиноятӣ нисбати ду нафари қаблан судшуда бо ҷурми қаллобӣ
Парвандаи ҷиноятӣ бо моддаи 247 қисми 4 Кодекси ҷиноятии Ҷумҳурии Тоҷикистон нисбати марди 66-солаи сокини ноҳияи Б.Ғафуров, ки пеш бо моддаҳои 247, 338 ва 323 Кодекси ҷиноятии Ҷумҳурии Тоҷикистон суд шудааст, оғоз карда гардид, ки ӯ тобистони соли 2015, бо роҳи фиреб ба боварии зани 46-солаи сокини ноҳияи мазкур даромада, барои гирифта додани қитъаи замини наздиҳавлигӣ 8 ҳазор доллари амрикоӣ гирифта, ба эҳтиёҷоти худ сарф намудааст.
Инчунин, парвандаи ҷиноятӣ бо моддаи 247 қисми 4 Кодекси ҷиноятии Ҷумҳурии Тоҷикистон нисбати марди 26-солаи сокини ноҳияи Б.Ғафуров, ки пеш бо моддаи 247 Кодекси ҷиноятии Ҷумҳурии Тоҷикистон суд шудааст, оғоз гардидаст, ки ӯ аз моҳи апрел то моҳи декабри соли 2022 бо роҳи фиреб ба боварии марди 37-солаи сокини ноҳияи мазкур даромада, барои аз Муассисаи ислоҳӣ озод намудани падараш аз ӯ маблағи 400 ҳазор сомонӣ гирифта, ба эҳтиёҷоти худ сарф намудааст.
Оид ба ин ҳодисаҳо тафтишот идома дорад.
Боздошт гардидани нафарони ҷинояти дуздӣ содир намуда
Ба ШВКД-1 дар ноҳияи Фирдавсӣ бо ариза марди 43-солаи сокини ноҳияи мазкур ворид гардидааст, ки 18-уми майи соли 2023, марди 38-солаи сокини ноҳияи Данғара, бо тариқи пинҳонӣ ба дукони савдояш, воқеъ дар ҶДММ бозори “Дӯстӣ” даромада, аз он ҷо 10-адад қубурҳои обгузари резиниро дуздида, аз ҷойи ҳодиса ғайб задааст.
Зарари расонидашуда 4 ҳазор сомониро ташкил медиҳад.
Инчунин, ҳангоми гузаронидани чорабиниҳои оперативӣ-ҷустуҷӯӣ аз ҷониби кормандони милитсия ҷавони 21-солаи сокини пойтахт, ки пеш бо моддаҳои 237 ва 110 Кодекси ҷиноятии Ҷумҳурии Тоҷикистон суд шудааст, бо гумони содир намудани ҷинояти дуздӣ дастгир карда шуд.
Номбурда, 8-уми декабри соли 2022, тахминан соати 20:00 ҳангоми дар тарабхонаи “Киш-миш”, қарор доштанаш, бо роҳи пинҳонӣ аз болои миз, 1-адад соати тиллоӣ, ки ба ҷавони 18-солаи сокини шаҳри Душанбе тааллуқ дорад, дуздида аз ҷойи ҳодиса ғайб задааст.
Зарари расонидашуда 1 ҳазору 200 доллари амрикоиро ташкил медиҳад.
Ҳамин тариқ, дар натиҷаи гузаронидани чорабиниҳои оперативӣ-ҷустуҷӯӣ аз ҷониби кормандони милитсия ҷавони 18-солаи сокини ноҳияи Рӯдакӣ ҳамчун гумонбар дар содир намудани ҷинояти дуздӣ дастгир карда шуд.
Номбурда, шаби 17 ба 18-уми апрели соли 2023, тахминан соати 00:10-дақиқа бо тариқи пинҳонӣ аз назди манзили истиқоматии марди 59-солаи сокини ҳамин ноҳия 3 сар чорвои майдаи шохдорро дуздида, аз ҷойи ҳодиса ғайб задааст.
Зарари расонидашуда 4 ҳазору 500 сомониро ташкил медиҳад.
Оид ба ин ҳодисаҳо тафтишот идома дорад.