Як ҷавони 28-солаи зодаи Тоҷикистон, ки шоми 9 марти соли 2023 аз маҳбаси сукунатӣ дар шаҳри Толяттии вилояти Самара фирор карда буд, баъди 3 рӯзи фирораш, рӯзи якшанбе, 12 март, дар назди хонаи модараш дар шаҳри Челябинск ба даст афтод. Дар ин бора рӯзи 13 март пойгоҳи маҳаллии хабарии “Волга.Нюс” хабар дод. Ин зодаи Тоҷикистон моҳи ноябри соли 2022 бо ҷурми дуздӣ ба 1 солу 8 моҳи зиндон маҳкум шуда буд ва мебоист моҳи июли соли 2024 озод мешуд. Вале ба эҳтимоли ғолиб ба ӯ акнун барои фирор аз маҳбас ҳукми тӯлонитар таҳдид мекунад.
Як манбаи “Волга Нюс” ҷараёни ҷустуҷӯи ин маҳбуси фирориро чунин нақл кардааст: “Маълум буд, ки модари маҳбуси фирорӣ дар Челябинск ва падараш дар Владивосток зиндагӣ мекунанд. Аз сабтҳои видеокамераҳои назоратӣ муайян карда шуд, ки ӯ баъди берун шудан аз ҳудуди маҳбас ба як мошини раҳгузар савор шуда рафтааст. Барои муайян кардани ин, ки чӣ мошине ӯро савор кардааст, як муддат барои таҳқиқи видеокамераҳои дигари назоратӣ лозим шуд. Дар ниҳоят муайян карда шуд, ки ӯ ба тарафи Челябинск рафтааст”.
Дар пайи ин, тамоми маълумот дар бораи маҳбуси фирориро ба пулис ва идораи зиндонҳои вилояти Челябинск фиристодаанд ва рӯзи 12 март ӯро замоне дастгир карданд, ки мехост ба хонаи модараш бидарояд.
РЕН ТВ қаблан хабар дод, ки ин маҳбус шоми 9 март аз маҳбаси сукунатӣ дар шаҳри Толятти фирор кардааст, вале зиндонбонҳо аз фирори ӯ танҳо нимашаб хабар ёфтаанд.
“Маҳбуси 28-сола аз тирезаи қабати сеюми бинои воқеъ дар кӯчаи Комсомол берун ҷаста, худсарона маҳбаси сукунатиро тарк кардааст “, – нақл карда буд манбаи РЕН ТВ.
Маҳбуси сукунатии №1, марбут ба идораи зиндонҳои вилояти Самара, дар ноҳияи Марказии шаҳри Толятти, дар кӯчаи Комсомолская, 129 ҷойгир шудааст. Дар ин маҳбас асосан онҳое, ки барои ягон ҷинояти сабуке, мисли дуздӣ, расондани осеб ба саломатӣ ё барои ягон садама маҳкум шудаанд, адои ҳукм мекунанд.
Маҳбуси тоҷики фироркарда аз моҳи ноябри соли 2022 дар маҳбас буд ва мебоист моҳи июли соли 2024 озод шавад. Ӯ қаблан дар Челябинск зиндагӣ мекард ва барои дуздӣ маҳкум шуда буд.
Дар бораи сабабҳои фирори маҳбуси тоҷик чизе гуфта намешавад. Вале вақтҳои охир аз маҳбасҳои Русия шикоятҳои зиёд ба даст мерасанд, ки мегӯянд, мақомоти зиндонҳо маҳбусонро бо таҳдиди кушодани парвандаҳои нав ва ба гарданашон андохтани ҳукмҳои тӯлонӣ маҷбур мекунанд, ки гӯё “ихтиёран” ариза навишта, ба ҷанги зидди Украина бираванд.
Дар моҳҳои охир дар бораи дар Украина кушта шудани дастикам 20 маҳбуси тоҷик хабарҳо ба даст расиданд. То поёни ҳукми бархеи онҳо ҳамагӣ чанд моҳи дигар боқӣ монда буд ва “бо хоҳиши худ” ба ҷанг рафтани онҳо ба назари наздиконаш хеле машкук менамояд.
Бино ба омори Идораи федералии зиндонҳои Русия (ФСИН), дар зиндонҳои ин кишвар тақрибан 8 ҳазор зодаи Тоҷикистон адои ҳукм мекунанд. Тақрибан чоряки онҳо барои ҷиноятҳои марбут ба қочоқ, нигоҳ доштан ва фурӯши маводи мухаддири асосан сохти Афғонистон дар Русия зиндонӣ шудаанд. Зодагони Тоҷикистон дар Русия ҳамчунин барои ҷиноятҳое, чун тақаллуби аснод, убури ғайриқонунии марзҳои Русия, ё барои садамаҳо зиндонӣ мешаванд. Вале тоҷикҳое низ ҳастанд, ки дар Русия барои ҷиноятҳое, чун дуздӣ, вай барои аъмоли сангинтаре, чун куштору ғоратгарӣ маҳкум ба зиндон шудаанд.