“Ӯ ТЕРРОРИСТ НЕ, МУҲОҶИР БУД…” НОМИ ЯК ТОҶИКИ КУШТАШУДА ДАР БЕЛГОРОД МАЪЛУМ ШУД
Радиои Озодӣ рӯзи 17 октябри соли 2022 хабар дод, ки бо мадади корбарон шахсияти яке аз тоҷикони дар вилояти Белгороди Русия кушташударо муайян кардааст.
Пайвандони Эҳсон Аминзода (Эҳсони Тоҷиддин), шаҳрванди 24-солаи Тоҷикистон, ки дар тамрингоҳи вилояти Белгороди Русия кушта шудааст, мегӯянд, “ӯ дар тарабхонае бар асоси патент кор мекард ва нияти ба ҷанг рафтан надошт”.
Онҳо иддао доранд, ки ӯ рӯзи 10-уми октябр дар назди метрои Люблинои шаҳри Маскав “гум шуда буд” ва хабари маргашро 16-уми октябр мақомоти рус расонданд.
Тоҷиддин Аминзода, падари Эҳсон, ки дар ҳукумати вилояти Хатлон кор мекунад, рӯзи 17-уми октябр дар тамоси телефонӣ хабари марги писарашро тасдиқ кард, аммо гуфт, ҳолати равонӣ барояш имкон намедиҳад, ки дар бораи писараш ҳарф занад.
Фирӯз Аминзода, бародари Эҳсон Аминзода, рӯзи 17-уми октябр дар суҳбат ба Радиои Озодӣ аз Маскав гуфт, ӯ ҳафт моҳ пеш ба Русия рафта, дар як тарабхона кор мекард.
“Бародарам шаҳрвандии Русияро надошт ва бо патент фаъолият дошт. Ҳоло маро ба прокуратураи ҳарбӣ даъват карданд. Намедонем, ӯ чӣ хел дар Белгород пайдо шуд? Бародари ман на террорист буд, на чунин фикр дошт. Як муҳоҷири одӣ буд, ки мехост кор кунад ва зиндагияшро бисозад,” – афзуд ӯ.
Фирӯз Аминзода гуфт, бародараш рӯзи якшанбеи гузашта, 10-уми октябр, баъд аз кор гуфтааст, ба назди дӯстонаш меравад ва ба ҳамин телефонаш хомӯш шудааст. Ӯ гуфт, бародараш “шахси мутаасиб набуд”.
Як дӯсти Эҳсон, ки нахост номашро зикр кунем, дар суҳбат бо Радиои Озодӣ гуфт, ӯ ҳеч гоҳ қасди ба ҷанг рафтан надошт ва мехост, зудтар пул кор кунад ва ба Тоҷикистон рафта, бо дӯстдоштааш издивоҷ кунад.
“Ҳамаи мо ба шок афтодем. Ӯро мекофтем ва фикр кардем, шояд ба назди кадом шинос ё ба Тоҷикистон рафтааст. Ният доштем, эълон диҳем, ки ӯ гум шудааст. Ақидаи ифротӣ надошт ва мисли ҷавонони дигар буд. Агар сахт диндор мешуд, дар ресторан кор мекард?” – гуфт ӯ.
Ҳамла дар тамрингоҳи Белгород рӯзи 15-уми октябри имсол рӯй дод ва мақомоти Русия онро кори ду зодаи як кишвари узви Иттиҳоди Давлатҳои Мустақил ва “ҳамлаи террористӣ” хонданд.
Алексей Арестович, мушовири Владимир Зеленский, президенти Украина, гуфт, ҳамлагарон аз Тоҷикистон буда, баъди баҳс бар сари дин ба сӯи ҳамхидматони худ оташ кушодаанд.
Мақомоти Тоҷикистон мегӯянд, даст доштани шаҳрвандони кишварро ба ҳамла ба Белгород таҳқиқ доранд. Дафтари матбуоти вазорати корҳои хориҷии Тоҷикистон дар номае ба Радиои Озодӣ рӯзи 17-уми октябр навишт, “сафорат дар Маскав аз пайи муайян кардани даст доштани шаҳрвандони Тоҷикистон дар воқеа ҳастанд.”
Тибқи иттилои вазорати дифои Русия, шоми 16 октябр бар асари тирандозӣ дар як машқгоҳи ҳарбӣ дар Белгород 11 нафар кушта ва 15 нафар захмӣ шудаанд. Онҳоро дар доираи маъракаи басиҷ ( мобилизатсия, сафарбаркунии нерӯҳои эҳтиётӣ) ба артиши Русия даъват шуда буданд.