ҚАЛЛОБӢ БО ПУЛИ ҶИПИ “РЕЙНҶ РОВЕР” ВА ДУЗДИИ ҶАВОҲИРОТ АЗ ХОНАИ ЯК ЗАН
Сокини 35-солаи Истаравшан ба он гумонбар мешавад, ки ҳанӯз моҳи августи соли 2022 бо роҳи фиреб аз як зани сокини Хуҷанд мошини тамғаи «Rаngе Rover»-ро 220 ҳазор сомонӣ нарх карда гирифтааст, вале ду сол боз пулашро намедиҳад.
ххххххххххххххххххх
Ноболиғи 15-солаи сокини Душанбе ба он гумонбар мешавад, ки моҳи июл аз хонаи як зани сокини пойтахт ҷавоҳироти тиллоияшро ба маблағи 6 ҳазор сомонӣ дуздидааст.
Аз навори хабарҳои маркази матбуоти ВКД Тоҷикистон аз рӯзи 30.09.2022
Аз худ намудани автомашинаи гаронбаҳо бо роҳи қаллобӣ
Нисбати марди 35-солаи сокини шаҳри Истаравшан парвандаи ҷиноятӣ бо моддаи 247, қисми 4 Кодекси ҷиноятии Ҷумҳурии Тоҷикистон оғоз карда шудааст, ки ӯ 28-уми августи соли 2020, бо роҳи фиреб ба боварии зани 42-солаи сокини шаҳри Хуҷанд даромада, автомашинаи тамғаи «Range Rover»-ро ба маблағи 220 ҳазор сомонӣ гирифта, то ҳол маблағашро барнагардонидааст.
Аз рӯи ин ҳодиса тафтишот идома дорад.
БАРОИ МАЪЛУМОТ: Ба ин гумонбаршаванда бар асоси қисми чоруми моддаи 247 барои қаллобӣ ба маблағи махсусан бузург ҷарима ваё аз 8 то 12 соли зиндон таҳдид мекунад.
Дуздии ҷавоҳирот аз хонаи истиқоматӣ
Ба ШВКД-1 дар ноҳияи Фирдавсӣ бо ариза зани 39-солаи сокини шаҳри Душанбе муроҷиат намудааст, ки моҳи июли соли 2022, тахминан соати 14:15-дақиқа, шахси номаълум бо роҳи пинҳонӣ ба хонаи истиқоматиаш даромада, аз он ҷо ҷавоҳироти гуногуни тиллоиро дуздида аз ҷойи ҳодиса ғайб задааст.
Зарари расонидашуда 6 ҳазор сомониро ташкил медиҳад.
Ҳангоми гузаронидани чорабиниҳои оперативӣ-ҷустуҷӯӣ аз ҷониби кормандони милитсия ноболиғи 15-солаи сокини шаҳри Душанбе ҳамчун гумонбар дар содир намудани ҷинояти дуздӣ дастгир карда шуд.
Аз рӯи ин ҳодиса тафтишот идома дорад.