РОНАНДАИ АВТОБУС БАРОИ БА САРИ МУСОФИР МУШТ БАРДОШТАНАШ АЗ КОР ПЕШ КАРДА ШУД (ВИДЕО)
Рӯзи 14 сентябри соли 2022 дар сегменти тоҷикии шабакаҳои иҷтимоӣ як видеои аз ҳама пурсарусадо видеои бадрафтории ронандаи автобуси хатсайри №43 шуд. Дар видеое, ки канали Parviz TV нашр кард, дида мешуд, ки ронанда чандин бор автобуси пур аз мусофирро бо суръати тунд ронда, якбора тормозро зер мекард, ки дар натиҷа чанд зану кӯдак рӯи фарши автобус афтоданд. Яке аз мусофирон ба ронанда эрод гирифт, ки “оромтар ронед, охир одам бурда истодаед”. Вале ронанда аз ин эрод ба хашм омада, ба сари он мусофир мушт бардошт ва аз гиребонаш гирифту таҳдид кард, ки “ҳоло ҳамаатро футбол мекунам!”
Бисёрии корбарон дар зери ин видео рафтори ронандаи автобусро ғайри қобили қабул ва ғайри қобили таҳаммул номида, аз мақомот хостанд, то нисбат ба ӯ чора бияндешанд.
Алакай соате баъди нашри ин видео, шоми 14 сентябр муассисаи давлатии коммуналии “Душанбенақлиётхадамотрасон” (Мдк Душанбенаклиётхадамотрасон) дар саҳифааш дар Фейсбук хабар дод, ки ронандаи дағалрафтори автобус ҷазояшро гирифт.
Дар пайи нашри ин видео муовини раиси шаҳри Душанбе, ки сарпарасти соҳаи наклиёт аст, ба роҳбарони сохторҳои дахлдор ва директори ККВД “Автобус-3” супориш додаааст, то ки нисбат ба ронанда чораҳои дахлдор андешиданд. Дар робита ба ҳодисаи мазкур дар ККВД “Автобус-3” бо иштироки мудири ин корхона ва мудири МДК “Душанбенақлиётхадамотрасон” ва ҳайъати кормандони корхона ҷаласаи фаврии интизомӣ доир кардаанд.
Бино ба иттилои муассисаи нақлиётӣ, ҳангоми баррасӣ муайян карда шудааст, ки ронандае, ки ба хато роҳ дода, бо мусофирон дағалона рафтор намудааст, ронандаи хатсайри автобусии №43, рақами қайди давлатиаш 99 51 ТТ 05, Бобоев Алишер Изатуллоевич мебошад. Ин ронанда собиқаи кории 5-сола доштааст.
“Аз ҷониби комиссияи интизомӣ ҳолати баамаломада мавриди баррасӣ карор дода шуда, дар асоси моддаи 4, қисми 17-и Кодекси меҳнати Ҷумҳурии Тоҷикистон ронанда Бобоев Алишер Изатулоевич аз кор озод карда шуд”, – хабар дод “Душанбенақлиётхадамотрасон”. Ин корхона, ки масъулияти умури нақлиёти мусофирбари пойтахти Тоҷикистонро бар дӯш дорад, афзудааст, ки “муассиса баҳри баланд бардоштани сатҳу сифати хизматрасонии нақлиётӣ ва ҳамзамон аз байн бурдани камбудиҳои дар ин самт ҷойдошта тамоми чораҳои заруриро меандешад”.
Аксари корбарон аз чунин вокуниши зуд ва қотеъи мақомот ба ин қазия истиқбол кардаанд.
Рӯзи 15 сентябр РВКД Душанбе хабар дод, ки Бобоевро боз 7 шабонарӯз ҳабс ҳам кардаанд.
Раёсати ВКД дар ш. Душанбе
Ронандаи автобус барои дағалрафторӣ бо мусофирон 7-шабонарӯз ҳабс ва аз фаъолияти мусофиркашонӣ маҳрум карда шуд Бобоев Алишер Иззатуллоевич, санаи таваллудаш 04.03.1983, истиқоматкунандаи шаҳри Душанбе кӯчаи Борбад, ронандаи автобуси хатсайри №43, рақами қайди давлатиаш 9951ТТ05, аз ҷониби кормандони милитсияи шаҳри Душанбе барои бадрафторӣ бо мусофирон дастгир карда шуд. Қобили зикр аст, ки санаи 14-уми сентябри соли ҷорӣ навори лаҳзаи дағалрафтории номбурда бо мусофирон дар шабакаҳои иҷтимоӣ нашр гардид, ки мавриди вокунишҳои шадиди шаҳрвандон қарор гирифта, аз мақомоти милитсия хостори андешидани чораҳои дахлдори қонунӣ шуданд.Зимни санҷиш муайян гардид, ки ҳодисаи мазкур санаи 13-уми сентябр тақрибан соати 11:30 дақиқа рух додааст. Вобаста ба ҳолати мазкур нисбати Бобоев Алишер тибқи талаботи моддаи 460 (майдаавбошӣ) Кодекси ҳуқуқвайронкунии маъурии Ҷумҳурии Тоҷикистон протокол тартиб дода шуда, аз ҷониби Суди ноҳияи Фирдавсӣ нисбати номбурда ҷазо дар намудаи ҳабси маъмурӣ ба муҳлати 7-шабонарӯз таъин карда шуд.