ПУТИН ҲАФТАИ ОЯНДА БА ТОҶИКИСТОН МЕОЯД (ВИДЕО)
Журналисти рус Павел Зарубин, муаллифи барномаи «Москва.Кремль.Путин» дар шабакаи телевизионии «Россия1», ки ӯро “хабарнигори шахсии Путин” ҳам меноманд, дар нашри навбатии барномааш хабар дод, ки президенти Русия Владимир Путин ҳафтаи оянда аз Тоҷикистон боздид мекунад.
“Дар ин ҳафта Путин аввал ба Душанбе меравад. Музокироти густарда бо президенти Тоҷикистон Эмомалӣ Раҳмон: ҳам суҳбат ва ҳам зиёфат пешбинӣ шудаанд”, — хабар дод Зарубин.
Тафсилоти дигар ва барномаи сафари Путин ба Тоҷикистон оварда нашудааст. Мақомоти расмии Маскаву Душанбе то ҳол дар бораи ин сафар расман ягон иттилоъ нашр накардаанд.
Зарубин хабар дод, ки Путин дар ин ҳафта баъди боздид аз Тоҷикистон ҳамчунин бо президенти Индонезия Ҷоко Видодо музокирот доир карда, сипас барои иштирок дар нишасти сарони давлатҳои ҳавзаи баҳри Хазар (Каспий) ба Ишқобод меравад.
Ин нахустин сафарҳои хориҷии Путин баъди оғози амалиёти ҳарбиаш ба зидди Украина аст.
Павел Зарубин як моҳ пеш дар барномаи «Москва.Кремль.Путин» видеои нодири рӯзи 16 май дар Маскав дар нишасти ҷашнии 30-юми ОДКБ бо якдигар гӯшакӣ кардани президентҳои Русияву Тоҷикистон Владимир Путин ва Эмомалӣ Раҳмонро нашр карда буд.
Дар сабт дида мешуд, ки қабл аз шурӯи қисмати пӯшидаи нишаст, вақте журналистон алакай тарки толор мекарданд, Эмомалӣ Раҳмон аз ҷояш хеста, чанд қоғаз дар дасташ пеши Путин омад ва болои сари ӯ хам шуда, чизеро пурсид. Тавре дар видео дида мешуд, Путин аввал аз суоли президенти Тоҷикистон изҳори ҳайрат мекунад, вале баъд ӯро ба пеши худ боз ҳам наздиктар хонда, ба гӯшаш бо овози паст чизе мегӯяд.
Баъди шунидани суханони Путин Эмомалӣ Раҳмон аз болои сари ӯ хеста, ба ҷои нишасти худ бармегардад.
Маълум нест, ки Путин ва Эмомалӣ Раҳмон дар бораи чӣ гӯшакӣ суҳбат кардаанд. Вале Павел Зарубин тахмин мезанад, ки мавзӯъ мавзӯи хеле муҳим буд.
Дар нишасти ОДКБ дар Маскав дар баробари масоили дигар вазъи Афғонистон ва таъсири он ба вазъи Осиёи Марказӣ низ баррасӣ шуд.
Дар арафаи ин нишаст дар бораи дастикам ду тирпарронӣ дар марзи Афғонистон бо Тоҷикистон хабарҳо ба даст расид ва Гулбиддин Ҳикматёр, як фармондеҳи собиқи муҷоҳидини афғон Душанберо ҳушдор дод, ки Толибон дар посух ба пуштибонии ошкорои мақомоти Тоҷикистон аз нирӯҳои зидди режими нави Толибон метавонанд ба мухолифини мусаллаҳи ҳукумати Тоҷикистон дар Афғонистон ҷойгоҳу пойгоҳ бидиҳанд ва вазъи ин кишварро ба осонӣ ба ҳам бизананд. Дуруст қабл аз ин изҳороти Ҳикматёр хабарҳое нашр шуд, ки дар баданаи мухолифини тоҷик як қаноати низомӣ пайдо шудааст.
Ҳамин тавр, дар он шабу рӯз ташаннуҷи дигарбораи авзоъ дар Вилояти Мухтори Кӯҳистони Бадахшон дар шарқи Тоҷикистон ба нигарониҳои амниятии Душанбе афзуда буд. Мавҷи нави эътирозҳо дар Бадахшон дуруст дар рӯзҳое сар шуд, ки Эмомалӣ Раҳмон дар Маскав дар нишасти ОДКБ иштирок дошт. Мақомоти Тоҷикистон эътирозҳоро дар Бадахшон бо истифода аз нерӯ саркӯб карданд, ки боиси ҳалокати даҳҳо нафар шуд.