Паҳлавони тоҷики муқими Русия Маҳмадбек Маҳмадбеков рӯзи 25 июни соли 2022 дар рақобати ниҳоӣ дар мусобиқоти байналмилалии гуштини дзюдо “Тоскулоҳи бузург” (Grand Slam Ulan Baator-2022) дар шаҳри Улан-Батор, пойтахти Муғулистон дар вазни 73 кило бар паҳлавони муғул Тсенд Очир ғолиб омад ва қаҳрамони ин мусобиқа шуд. Маҳмадбек Маҳмадбеков дар даври ниманиҳоӣ Тоҳар Битбул аз Исроилро шикаст дод.
Маҳмадбек Маҳмадбеков, фарзанди Ҳоҷӣ Шоин Махмадбеков , тоҷики муқими Русия, ки ҳамагӣ 22 сол дорад, ҳамроҳи писарамакаш Сомон Маҳмадбеков (нахустин қаҳрамони дзюдо байни ҷавонон аз Тоҷикистон) дар назди амакҳои худ Эргаш ва Фотеҳ Маҳмадбековҳо дар шаҳри Иркутски Русия машқ мекунанд. Сомон Маҳмадбеков дар мусобиқаҳои байналмилалӣ таҳти парчами Тоҷикистон ҳунарнамоӣ мекунад. Вале Маҳмадбек Маҳмадбеков – дар ҳайъати Русия.
Азбаски Русияро ба далели ҷангаш ба зидди Украина аз ҳаққи ширкат дар аксари мусобиқаҳои байналмилалӣ маҳрум кардаанд, Маҳмадбек Маҳмадбеков дар мусобиқоти “Тоскулоҳи бузург” дар Улан-Батор таҳти парчами Федератсияи байналмилалии гуштини дзюдо (IJF) ба майдон баромад.
Ин алакай сеюмин медали тиллои Маҳмадбек Маҳмадбеков дар мусобиқоти “Тоскӯлоҳи бузург” аст. Маҳмадбек дар соли 2021 соҳиби ду мақоми аввал ва медалҳои тиллои мусобиқоти “Тоскӯлоҳи бузург” дар Қазон ва Боку гардида, Дар Загреб медали биринҷӣ ба даст овард.
То имрӯз Маҳмадбек нахустин ва ягона варзишгари тоҷик аст, ки се маротиба барандаи нишони тиллои мусобиқоти “Тоскӯлоҳи бузург” (Grand slam) гардидааст.