ҶАСАДИ ЯК ДУХТАРИ ҶАВОНРО АЗ ДАРЁИ ДУШАНБЕ ПАЙДО КАРДААНД
Кумитаи ҳолатҳои фавқулоддаи Тоҷикистон хабар дод, ки наҷотбахшонаш шоми 8 июни соли 2022 аз дарёи Душанбе дар пойтахти ҷумҳурӣ ҷасади як духтари ҷавони зоҳиран 18-20-соларо берун кашидаанд. Шахсияти духтари ғарқшуда ва кай ва чӣ гуна ғарқ шуданаш ҳанӯз маълум нест.
Дар хабари кӯтоҳе, ки дар сомонаи Кумита нашр шуд, чунин омадааст: “8 июни соли 2022, соати 16:10 ба қисми навбатдории Кумитаи ҳолатҳои фавқулодда корманди шуъбаи милитсияи ноҳияи Сино, ки дар ҳудуди муассисаи давлатии “Наврӯзгоҳ” навбатдорӣ мекард, занг зада, хабар додааст, ки дар инҷо оби дарёи Душанбе ҷасади як духтари ҷавони зоҳиран 18-20-соларо берун баровардааст. Баъди дарёфти хабар наҷотбахшони раёсати ҳолатҳои фавқулоддаи шаҳри Душанбе ба ҷои ҳодиса сафарбар карда шуданд. Соати 19:40 ҷасадро аз дарё бароварда, ба мақомоти ҳифзи ҳуқуқ супурданд. Тафтишот идома дорад.”
Танҳо аз аввали моҳи июн Кумитаи ҳолатҳои фавқулодда алакай дар бораи ғарқ шудани дастикам 6 нафар дар кӯлу дарёҳо ва каналҳои Тоҷикистон хабар додааст.
Аз ҷумла Кумитаи ҳолатҳои фавқулоддаи Тоҷикистон ахиран хабар дод, ки танҳо дар як рӯзи 7 июни соли 2022 дар вилояти Хатлон ҷасади боз ду нафарро аз об берун овардаанд. Ҷасади як духтари ҳамагӣ 13-солаи хонандаи синфи шашуми мактаби №14 аз шаҳри Левакантро баъди 6 рӯзи ғарқ шуданаш аз даруни дарёи Вахш дар қаламрави ҷамоати шаҳраки Бустонқалъаи ноҳияи Кушониён пайдо кардаанд. Ҷасади сокини 51-солаи деҳаи Сари Роҳи ҷамоати шаҳраки Балхи ноҳияи Ҷ.Балхиро бошад баъди як рӯзи ғарқ шуданаш аз канали Қумсангир, якуним километр поёнтар аз маҳалли ғарқ шуданаш ёфтаанд.
Тибқи маълумоти Раёсати ҳолатҳои фавқулоддаи вилояти Хатлон, рӯзи 7-уми июн, тахминан соати 13:45, кормандони фурудгоҳи шаҳри Бохтар аз рӯи об намудор шудани ҷасади як духтар дар қаламрави ҷамоати шаҳраки Бустонқалъаи ноҳияи Кушониён хабар додаанд.
Дастаи наҷоти Раёсати КҲФ дар вилояти Хатлон фавран ба ҷойи ҳодиса ҳозир шудааст ва ҷасадро аз об бароварда, ба сохторҳои дахлдор супоридааст.
Кумитаи ҳолатҳои фавқулодда гуфт, маълум гардид, ки марҳум сокини шаҳри Левакант кӯчаи М.Турсунзода, хонандаи синфи 6-и мактаби миёнаи №14 буда, ҳамагӣ 13 сол доштааст.
Бино ба маълумоти расида, ин духтари ноболиғ рӯзи 1-уми июн дар оби дарёи Вахш дар ҳудуди шаҳри Левакант, ҷамоати деҳоти Ваҳдат, деҳаи Нурафшон ғарқ шуда буд.
Сабаби марги духтари ноболиғ аз ҷониби мақомоти салоҳиятдор таҳқиқ мешавад.
Ҳамчунин рӯзи 6 июн аз нопадид шудани як сокини 51-солаи деҳаи Сари Роҳи ҷамоати шаҳраки Балхи ноҳияи Ҷ.Балхӣ хабар расида буд. Баъди пурсуҷӯи шоҳидон ва роҳандозии корҳои ҷустуҷӯӣ, сару либоси ӯро дар соҳили канали Қумсангир, дар мавзеъи ноҳияи Ҷ. Балхӣ пайдо намуданд.
Рӯзи 07.06.2022, дар натиҷаи корҳои ҷустуҷуӣ – кофтуковӣ аз ҷониби нерӯҳои ғайриҳарбӣ ва Дастаи махсуси зудамали наҷоти Раёсати ҳолатҳои фавқулоддаи вилояти Хатлон ҷасади ин мардро 1500 метр поёнтар аз ҷойи ҳодиса пайдо карданд ва ба хешовандонаш супурданд.
Сабаби ғарқ шудани ин мард низ маълум нест.
Ба ҳисоби КҲФ, аз аввали соли ҷорӣ алакай беш аз 30 нафар, аксаран ноболиғон дар рӯду кӯдҳои Тоҷикистон ғарқ шудаанд. Соли 2021 дар рӯду кӯлҳои Тоҷикистон 155 нафар, аз ҷумла 75 ноболиғ ҷон бохта шуданд.