ГУМОНБАРИ АСОСИИ ЗАНОЗАНӢ ДАР ЕКАТЕРИНБУРГ БА ТОҶИКИСТОН ФИРОР КАРДААСТ
Шаҳрванди Тоҷикистон Суннатулло Маннонов ба Тоҷикистон фирор кардааст. Манноновро тафтишот раҳбари эҳтимолии гуруҳи ҷавонони тоҷике меномад, ки шаби 28 май дар маҳаллаи Химмаш як сокини Екатеринбургро шадидан латтукӯб кардаанд. Он ҷавон ҳоло дар дҳолати кома қарор дорад ва ба 4 муҳоҷири тоҷики дастгиршуда ҳукми зиндон таҳдид мекунад.
Як манбаъ дар пулиси Екатеринбург ба нашрияи маҳаллии Ура,Ру хабар дод, ки “дар ҷараёни бозпурсӣ тоҷикҳои дастгиршуда баёнот додаанд, ки занозаниро маҳз Суннатулло сар кард ва он ҷавони маҳаллӣ ва дигар сокинони Екатеринбургро ҳам маҳз вай латтукӯб кардааст. Мегӯянд, ки ӯ тавонистааст ба Тоҷикистон фирор кунад. Ҳарчанд 4 нафари дигарро бо гумони иштирок дар он занозанӣ алакай дастгир кардаанд”.
Сомонаи маҳаллии 66.ru қаблан хабар дод, ки пулис дар пайи латтукӯби як сокини Екатеринбург дар маҳаллаи Химмаш 4 гумонбарро дастгир кардааст ва ҳоло ҷустҷӯи гумонбари панҷум идома дорад. Ин нашрия мегӯяд, сокини маҳаллиро зодагони Тоҷикистон латтукӯб кардаанд.
Бино ба иттилои 66.RU, ҳодиса шоми 28 майи соли 2022 дар кӯчаи Грибоедов дар минтақаи Химмаши шаҳри Екатеринбург аз баҳси ибтидо лафзӣ байни гуруҳи зодагони Тоҷикистон ва як ҷавоне, ки бо дӯстдухтараш сайругашт дошт, оғоз ёфтааст.
Ин баҳси онҳо баъдан ба занозанӣ печида, ҷавонони тоҷик он ҷавони маҳаллиро ба замин афтонда, зери борони мушту лагат гирифтаанд.
Раҳгузарон дахолат карда, монеи идомаи латтукӯби он ҷавон шудаанд ва ҷавонони тоҷикро то чанд кӯчаи дигар ба истилоҳ сур кардаанд.
Сабаби муноқиша маълум нест, вале гуфта мешавад, ки ҷавони маҳаллиро дар ҳолати кома бистарӣ кардаанд ва ҳоло табибони бемористони шаҳрии №24 барои наҷоти ҷони ӯ аз чанголи марг мубориза мебаранд.
Маркази матбуоти пулиси Екатеринбург дар шарҳи ин қазия гуфт:
— Хабари муноқиша ба шуъбаи пулиси № 13 расид. Дар ҳоли ҳозир кормандони бахши ҷустуҷӯи ҷиноӣ чанд нафари дастдошта дар ин ҳодисаро дастгир кардаанд. Шуъбаи пулис дар робита ба ин ҳодиса бар асоси қисми якуми моддаи 111 Кодекси ҷиноятии Русия бо иттиҳоми расондани зарари вазнин ба саломатӣ парвандаи ҷиноятӣ кушодааст.
Бино ба иттилои66.RU, дар ин ҳодиса 5 нафар даст дошта, 4 тани онҳо боздошт шудаанд ва ҷустуҷӯи панҷумаш идома дорад. Ба онҳо бар асоси қисми якуми моддаи 111 ҳамчун ҷазо то 8 соли зиндон таҳдид мекунад. Вале агар, Худое накарда, ҷабрдида бимирад, ба ин зодагони Тоҷикистон бар асоси қисми сеюми моддаи 111 то 15 соли зиндон таҳдид хоҳад кард.