IRS: НАФАРОНИ ДАР МАСТЧОҲ АЗ СӮИ РОНАНДАГОНИ ӮЗБЕК ЛАТТУКӮБШУДА КОРМАНДОНИ МО НЕСТАНД (ВИДЕО)
Ширкати IRS, масъули нигоҳубини роҳи мошингарди Душанбе – Хуҷанд – Чаноқ, рӯй додани муноқиша байни ронандагони ӯзбек ва сокинони Тоҷикистон дар ҳудуди ноҳияи Мастчоҳ дар наздикии марз бо Ӯзбекистонро тасдиқ кард, вале гуфт, нафарони аз ҷониби ронандагон латтукӯбшуда кормандони IRS нестанд.
Дар маркази матбуоти ширкати IRS рӯзи 15 май ба пойгоҳи хабарии “Бомдод” дар шарҳи видеои нашршудаи он муноқиша чунин гуфтанд: “Дар воқеъ, чунин як муноқиша дар минтақаи Мастчоҳ рух додааст. Вале ба IRS ва кормандони мо дахл надорад. Кормандони мо, хоса онҳое, ки дар плазаҳо фаъолият мекунанд, либоси махсус доранд. Аз ҷониби дигар, маҳалли муноқиша дар байни заминҳо, хеле дур аз плазаҳои мо воқеъ шудааст”.
Як манбаи огоҳ аз ҷараёни қазия ба “Бомдод” гуфт, муноқиша байни сокинони ноҳияи Мастчоҳ ва гуруҳи ронандагони мошинҳои боркаш аз Ӯзбекистон рух додааст. Вале сабаби муноқиша ҳанӯз норавшан боқӣ мемонад.
Муҳаммад Тағоев, як фаъоли мухолифини тоҷик шоми 14 май дар саҳифааш дар Фейсбук видеои лаҳзаи латтукӯби чанд нафар аз ҷониби як гуруҳи ронандагони мошинҳои боркашро нашр кард. Тағоев навишт, дар ин видео лаҳзаи латтукӯби коргарони IRS дар даруни марзи Тоҷикистон аз ҷониби ронандагони ӯзбек сабт шудааст.
Муҳаммад Тағоев рӯзи 15 май ба пойгоҳи хабарии “Бомдод” гуфт, бино ба иттилои ӯ, ин ҳодиса рӯзи 14 май дар ҳудуди ноҳияи Мастчоҳ дар шоҳроҳи Душанбе – Хуҷанд – Чаноқ рӯй додааст. “Ронандаҳои ӯзбекистонӣ пули тарозуро надоданд ва аз ин рӯ, коргарони ширкати IRS рақами мошинҳои онҳоро канданд, ронандагон дар посух кормандонро задаанд”, нақл кард Муҳаммад Тағоев. Вале IRS гуфт, нафарони аз сӯи ронандагон латтукӯбшуда рабте ба ин ширкат надоранд.
Дар видео дида мешавад, ки як гурӯҳи ронандагоне, ки ба забони ӯзбекӣ ҳарф мезананд, аввал як нафарро дар даруни алафзори канори роҳ латтукӯб мекунанд ва сипас ба тарафи як нафари дигар рафта,ба рӯи шаппотӣ мезананд ва талаб мекунанд, ки рақамҳои аз мошинҳои онҳо кандаашонро баргардонад.
Яке аз ин ронандагон бо садои баланд кормандони тоҷикро ба миллатчигӣ айбдор мекунад ва мегӯяд, ин корашон беҷазо нахоҳад монд. Қад-қади роҳ шумори зиёди мошинҳои боркаш дида мешаванд, ки барои убур аз тарозу навбат истодаанд.
Шоҳроҳи Душанбе – Хуҷанд – Чаноқ ягона роҳи заминист, ки вилояти Суғд дар шимоли Тоҷикистонро бо қисматҳои боқимондаи ин ҷумҳурӣ, аз ҷумла бо пойтахташ, шаҳри Душанбе мепайвандад. То сохта шудани нақби “Истиқлол” дар ин шоҳроҳ ягона роҳи байни шимол ва маркази Тоҷикистон аз тариқи ағбаи Анзоб буд, ки дар зимистон баста мешуд.
Шоҳроҳи Душанбе – Хуҷанд – Чаноқ аз пойтахти Тоҷикистон тавассути кӯҳҳои Зарафшону шаҳри Хуҷанд то марзи Ӯзбекистон сохта шудааст.
Шоҳроҳи Душанбе – Хуҷанд – Чаноқ дар даҳаи аввали асри 21 бо наздики 300 миллион доллар қарзи Хитой навсозӣ шуда, аз соли 2009 масъулияти нигоҳубин ва пулчиниаш ба ширкати IRS вогузор карда шуд. Дар ҳоли ҳозир ин ягона роҳи пулакӣ дар Тоҷикистон аст. IRS аз моҳи январи соли 2022 нархи убури ин роҳро дастикам 50% боло бурд.