ВИДЕО АЗ ҶОИ ҲОДИСА: 6 ЗАХМӢ БАР АСАРИ ТАРКИШИ МОШИНИ СӮЗИШВОРӢ ДАР ОББУРДОН
Хонандагони пойгоҳи хабарии “Бомдод” сабти видеоиеро фиристоданд, ки дар он лаҳзаи сӯхтор ва таркиш дар як нуқтаи фурӯши сӯзишворӣ дар ноҳияи Мастчоҳ сабт шудааст. Ин ҳодиса шоми 10 май рӯй дод. Кумитаи ҳолатҳои фавқулоддаи Тоҷикистон қаблан хабар дод, ки рӯзи 10 майи соли 2022 бар асари таркидани як мошини пур аз сӯзишворӣ дар як нуқтаи фурӯши маводи сӯхт дар ҷамоати Оббурдони ноҳияи Мастчоҳ дар шимоли ҷумҳурӣ 6 нафар ҷароҳат бардоштанд.
Бино ба иттилои ин ниҳод, рӯзи 10 май ба қисми навбатдории Кумитаи ҳолатҳои фавқулодда хабар расид, ки дар як нуқтаи фурӯши сӯзишворӣ дар ҳудуди ҷамоати деҳоти Оббурдони ноҳияи Мастчоҳи вилояти Суғд як мошини пур аз маводи сӯхт оташ гирифта, таркидааст.
“Бар асари таркиш нуқтаи фурӯши маводи сӯхт ва иншооти атрофи он хароб шуда, 6 нафар ҷароҳатҳои гуногун бардоштанд. Ҳамаи онҳоро дар бемористони ноҳияи Мастчоҳ бистарӣ кардаанд”, – гуфта мешавад дар хабар.
Сабаби таркиш ҳанӯз равшан нест. Гуфта мешавад, мақомоти ҳифзи ҳуқуқ дар ҳоли ҳозир машғули муайян кардани сабабҳои оташ гирифтани таркидани ин мошини пур аз маводи сӯхт мебошанд.