ФарҳангЧеҳраҳо

ШОИРИ ТОҶИК НУҚРИДДИН МАҲКАМПУР ДАР МУЛКИ ҒУРБАТ ДАРГУЗАШТ

Аз дарди ту хун гирист лола,

Дар ҳар чамане, ки настаран нест.

Пироҳани порагаштаи гул,

Дар мотами ту ба ҷуз кафан нест.

Сад марсия бар ту менавиштам,

Аммо ба лабам зи ғам сухан нест.

Муаллифи ин шеър шоири қариб ҳама умр мусофиру  мисли садҳо ҳазор ҳамватанаш қариб ҳама умр ғариби тоҷик Нуқриддин Маҳкампур шаби 7 апрел дар мулки ғурбат ба раҳмати Ҳақ пайваст. Дар ин бора дар Фейсбук шоир ва рӯзноманигори тоҷик Мақсудалӣ Муҳаммадалӣ  хабар дод.

“Ба мухлисону наздиконашон хабари нохушеро мерасонам, ки дили пурошӯбу сухансанҷу сухандони шоири хушзабон, устоди борикбин, Нуқриддин Маҳкампур , шаби гузашта дар ғарибиҳо аз тапидан бозмондааст. Худо раҳмату мағфираташон кунад устодро”, навиштааст Мақсудалӣ Муҳаммадалӣ. Дар бораи иллати марги шоир чизе гуфта нашудааст.

Нуқриддин Маҳкампур ( Нухриддин Назмиддинов ) 1 декабри соли 1963 дар деҳаи Понғози ноҳияи Ашти вилояти Суғд ба дунё омада, соли 1985 ба риштаи математикаю механикаи Донеишгоҳи давлатии Тоҷикистон дохил шудааст. Баъди хатми донишгоҳ дар мактаби №4 ба номи Маъдан дар зодгоҳаш чанд сол ба ҳайси муаллими фанни математика ва барномасозӣ кор карда, аз соли 1996 то 2010 устоди ап сипас мудири кафедра и математика ва барномаҳои технологии Донишгоҳи аграрии шаҳри Ярославли Русия буд. Аз соли 2010 дар Донишкадаи кӯҳию металлургии шаҳри Бӯстон дарс медод.

Аз Нуқриддин Маҳкампур чанд китоби шеър, аз ҷумла “Савти рӯди Понғоз” ва “Ашки ситора” ба ёдгор монд.

Шоири шинохтаи тоҷик Рустами Ваҳҳоб навиштааст, “равоншод табъу қареҳаи саршори шеърӣ дошт ва ҳанӯз навиштаҳояшро тадвин накарда буд. Ёдаш ба хайр”.

Намунаҳое аз ашъори Нуҳриддин Маҳкампур:

      НУКРИДДИНИ МАХКАМПУР

                                      БАНДИ КУРУН

Шаб  даргузашту  ман  ҳама  зарроти  ҳастиро

Густурдаам  ба  домани  андешаҳои  хеш.

Дар  нимароҳи умраму  такрори  рӯзу  шаб,

Дар лобалои  роҳи напаймудаи  ҳаёт,

Андешаҳои  ҷамъи  маро  мекунад  пареш.

Андешаҳо  ба  рафтану  тақвим  бо  хутут,

Аз  рӯзҳои  гумшудаи  ман  дарак  диҳад.

Пурсам  зи  худ,  ки  рӯз  чаро  моили  шаб  аст,

Тақвим  гоҳ  сурху  гаҳе  рӯсияҳ  шуда,

Посух  диҳад, ки  банди  қурун  бар  ту  шак  диҳад.

Банди  қурун  ба  пою  ба  сар  меҳри  меҳанам,

Ман  мерасам  ба  решаву  пайванди  қарнҳо.

Бинам  тулӯъи  субҳи  Хуросону  шоми  дашт,

Ҳайфо, ки  боз  бинам  ҳангомаи  ғуруб,

Пас  огаҳӣ  биёбам  аз  банди қарнҳо.

Чун  бо  хаёл  боз  ба  тақвим  бингарам,

Мехоҳам  он  саодату  Наврӯзи  ин  диёр.

З – он  сафҳаи  ғурубии  таърихи  пур  зи  банд,

Бо  кохи  ҷовидонаи  Фирдавсии  бузург,

Ман  мерасам  ба  субҳи  дилафрӯзи  ин  диёр.

Ин  бор  агар  ба  решаву  пайванди  худ  расам,

Меҳре  ба  қалби  кӯчаки  ман  ошён  кунад.

Андешаҳо   кушода  пару  бол  бар  уфуқ,

Меҳре  қадим  шӯъла кашад  аз  оташи  дилам,

Ин  меҳри  меҳан  асту  маро  парфишон  кунад.

                            ОЛИХА

Сураткаши   ҷавонаму  бо  хомаи  хаёл ,

Акси  туро  ба  сафҳаи  дил  наҳш  бастаам .

То  ин  ки  чашмҳои  ту  аз  ноз  пур  шавад ,

Дар  рӯ  ба  рӯи  акси  ту  шабҳо  нишастаам .

Ҷуз  дидани  ту  орзуи  дигарам ,  ки  нест ;

Рӯи  туро  пур  аз  гули  маҳтоб  кардаам .

То  ин  ки  сурхтар  бишавад  ғунчаи  лабат ,

Дилро  дар  оташи  нигаҳат  об  кардаам .

Оҳ , эй  арӯси  чеҳранамои  хаёли  ман ,

Огаҳ  наӣ ,  ки  дил  ба  нигоҳи  ту  додаам ?

Мехостам : кунам ба нигоҳи  ту  арзи  ҳол ,

Аммо зи  шарми  рӯи  ту  кай лаб  кушодаам ?

Оҳ . эй  арӯси  ёди  ман , эй  Шаҳрзоди  ман ,

Як шаб маро ба  сӯи  худ  овоз  додаӣ .

Бикшода  бар   рухам  дари  бахти  сапедро,

Дар  шаҳри  ҳиссаҳо  маро  парвоз  додаӣ .

Он  шаб , ки сӯхт барҳи нигоҳат дили маро ,

Ранге зи ахтарон ба нигоҳи  ту  рехтам .

Он ахтарон , к – аз олами дигар нишонаанд  ,

Чун ҳатраашки  гарм  ба  роҳи  ту  рехтам .

Дил  гуфт , к – эй олиҳа ҳанӯз  аввали  шаб  аст ,

Аз  осмони  хеш  фуруд  ою  ҳисса  гӯ .

Дунболи  ахтарон  мабар  ин  содаҳалбро ,

Овоз  кун ,  ки  нагзарад  ин  ишҳу орзӯ .

Аммо чи шуд ,ки  боз туро дидаам ба хоб ,

Пиндоштам ,  ки он гули маҳтоби ман  туӣ .

Мехостам ,  ки ахтари нав ҷустуҷӯ кунам ,

Шуд  рӯшанам,  ки  олами ноёби  ман  туӣ .

Оҳ ,  эй  арӯси  чеҳрафурӯзи хаёли  ман ,

Хуш омадӣ ба ранги умеди ҷавониям .

Танҳо туӣ олиҳаи бахти ҷавони ман ,

Бошад . ки ба орзуи ҷавонӣ  расониям .

https://sites.google.com/site/nukriddinimahkampur/_/rsrc/1321684285209/home/2011-07-14_203429.jpg?height=220&width=320

 Гусел 

Боз  мехонад  маро  роҳи  дароз ,

Ҷомадонам  рӯ  ба  рӯи   модарам .

Бод  гулҳои   сапеди   себро ,

Кам – кам    афшонад   ба   мӯи   модарам .

                Гул  ба   сар  бинҳода  зери  шохаҳо 

                Гӯш  дорад  бар  навои  шаршара .

                Даст бардорад  пас  аз  чандин  хаёл  ,

                Меравам ,  оби  гулӯям  ғарғара  .

Дур монам  аз нигоҳаш   дергоҳ ,

Шохсорон  меҳрубони  ӯ  шаванд .

Баркашида   даст   бар   деворҳо ,

То  ба  боми  хона  боло  мераванд .

                Моҳ андармон шуда  бар шохсор ,

                Тирашабҳои варо равшан кунад .

                Завраҳе дар ҳавзи  пои  шаршара ,

                Бандаре  бар  тифлиҳои  ман кунад .. .

Пир  гаштам   аз   сафарҳои  дароз  ,

Лек  дар  чашмони  ӯ  ман  кӯдакам .

Гӯ   магар  дар  рӯи  обам   раҳсипор

Монда  танҳо   ғарҳи  сели   рӯдакам .

                Гул  ба   сар  бинҳода  зери  шохаҳо 

                Мову  ӯ  ду   ҳамнавои   шаршара .

                Осмонро бар каф орад модарам ,   ,

                Меравам  бар  сарзаминҳои  сара  .

https://sites.google.com/site/nukriddinimahkampur/_/rsrc/1322057208978/home/-%D0%9D%D0%B0%D0%B7%D0%BC%D0%B8%D0%B4%D0%B4%D0%B8%D0%BD%D0%BE%D0%B2%20%D0%9C.jpg?height=320&width=240

                                                         ПАДАР

                              Падар, ман омадам аз рохи дур суи ту боз,

                               Ки  то  ба  пои  мазори  ту  ашки  хун  резам .

                               Нарафта  аз дили ман то  ҳанӯз  меҳри  ту  ҳеҷ ,

                               Зи  хоки  пои  мазори  ту  ман  чӣ  сон  хезам ?

                                               Зи ёди ман наравад  рӯзи  рафтанат  ба  ғуруб ,

                                               Ба  пушти  пои  ту  хуршед  соя   меафканд

                                               Чи  гуна  бо  нигаҳи  вопасин   маро  ҷустӣ  ,

                                               Ки  бо  ғуруб  сари  риштаҳои  умри  ту  канд .

                               Дар  он  ғуруб  ,  ки  сигори  ту  ба  дастам  монд ,

                               Замони кӯдакиям  ранги  дигаре  бигирифт .

                               Дар  он  ғуруб  сияҳпӯш  гашт  модари  ман

                               Ту  ногаҳон  , ки  бирафтӣ  ман  омадам ба  шигифт .

                                               Дигар ту аз дами дарҳо намешудӣ пайдо

                                               Дигар ту бар сари зону маро набиншондӣ .

                                               Наомадӣ ба шаби тор бо гули маҳтоб

                                               Дигар ба гӯши ман афсонае намехондӣ .

                               Маро бубахшу магӯ,к – аз   чи дер боз наям  ,

                               Бирафтаам  ба зимистону барфу сармое .

                               Ба  ҳар куҷо . ки равам ёду ёдгори туям

                               Ба   хоби  ман  ту  зи  боғи  баҳор  меоӣ .

                                               Дар  ин  мазор  чиҳил  сол  хуфта  кай  донӣ ,

                                               Ки  ман  китоби  туро  хонда  устод  шудам .

                                               Ба  дуди  нилии  сигори ман  бихезу  бубин ,

                                               Чи  сон  ба   хотира  бунёди  боғи  ёд  шудам .

                               Падар , ман омадам аз роҳи дур  сӯи  ту  боз ,

                               Ки  то  ба  пои  мазори  ту  ашки  хун  резам .

                               Нарафта аз дили ман то  ҳанӯз меҳри ту ҳеҷ ,

                               Зи  хоки  пои  мазори  ту  ман  чӣ сон  хезам ?

https://sites.google.com/site/nukriddinimahkampur/_/rsrc/1321702015713/home/2011-07-20_162412.jpg?height=283&width=400

            ШОХИ    САФЕДОР

Деҳ   ба   бар  густурда  саҳрои  фарох ,

Хонаҳояш   дар  фарози  кӯҳсор .

Бод  бо  амвоҷи  сабз  омехта ,

Баста  олу    бар  сари  худ  шохсор .

Хомаи  шохи  сафедор  аз  ҳавас ,

Осмонро  ранг  мезад    сӯ   ба  сӯ .

Бар  карон  абри  сиёҳе  мекашид ,

Хандаи  хуршедро  аз    рӯ  ба  рӯ .

Найлабак   созам  зи  валдирғони  тар  ,

Ҳар  нафас  оҳанги  борон  менавохт  .

Ҳамнаво  будам  ба  афғоне ,  ки  бод ,

Мегузашту  нағма  аз  ҷон  менавохт .

Найнавозон  бигзарам  аз  боғи  сабз ,

Гиря  мекард  аз  карон  абри  гузар .

Хандаи  хуршед   гум  мешуд   зи   лаб ,

Чун  ба  хотир  оварам  марги  падар .

Кӯдакӣ  бо  найнавозиҳо  гузашт ,

Хомаҳоямро   дигар  бибридаанд .

Хушксолӣ  омада   бар  сӯи  деҳ  ,

Абрҳоро    аз    гузар  бибридаанд  .

https://sites.google.com/site/nukriddinimahkampur/_/rsrc/1321773523453/home/%D0%9C%D0%B0%D1%81%D1%87%D0%B8%D0%B4%D0%B8%20%D0%9F%D0%BE%D0%BD%D0%B3%D0%BE%D0%B73.jpg?height=240&width=320

              ДИЁРИ ХУД

Барнатобам  чу  ғами  ғурбатҳо ,

Дар  паи  азми  диёре  бошам .

Солҳо  дур  бигаштам  зи  диёр ,

Ман  кунун  роҳсипоре  бошам .

Он  диёре  ,  ки  маро  мехонад ,

Медиҳад  акси  садо  бо  кӯҳаш  .

Гарчӣ  андӯҳ  ба  дил  афзояд ,

Беҳ  зи  шодӣ  бувад  он  андӯҳаш .

Меравам  сӯи  деҳ  аз  шаҳри  бузург ,

Боз   дар  кӯча   ҳувайдо   гардам.

Мардуми   деҳ  чу   маро   бишносанд ,

Ман  ба  худ  гум  шуда  пайдо  гардам .

Кӯҳсорон   сари  худ  афрозанд ,

То  бубинанд  кӣ  омад  хандон .

Офтоб  омада  аз  кӯҳи  баланд ,

Муҷдаҳо  медиҳад  аз  пайвандон .

Дӯстонам  ҳама  оянд , ки  боз ,

То  бисанҷанд  худ  оғӯши  маро .

Омадам  ,  шаршараҳо  мехонад ,

Ҳиссаҳои  лаби  хомӯши  маро  .

       КОЛИНИ САБЗ

Шом  ҳолини  сабз  мепардохт ,

Шаб  расид  аз  фарозу  шабнам  зад .

Субҳидам  офтоб  аз  паси  кӯҳ ,

Ханда  бар  лаб  ба  боғҳо  дам  зад .

Шабнам  об  аз  нигоҳу  ханда  шуда

Сар  ба  печоналаф  дурахшон  шуд .

Ашки  миҷгони  сабзи  боғ  , ки рехт ,

Абр  аз  дур  диду  гирён  шуд .

https://sites.google.com/site/nukriddinimahkampur/_/rsrc/1321774756398/home/2011-09-15_162839.jpg?height=183&width=320

                  БОЛИШТ

Эй  сарзамини  хаставу  зори  ман ,

Болишти  туст  домани  кӯҳистон .

Бистар  кашидаӣ  ба  ғубори  дашт ,

Хобат  намебарад  зи  нами  борон ?

Ман  омадам  ,  маро  ту  ба  оғӯш  ор .

Бо  обшор  гиря  бикун  бо  ман  .

Ҷоям  бидеҳ  аз  он  сари болинат ,

Фарзанди  кӯчаки  туям  ,  эй  меҳан .

Абрам  , ки  дар  фарози  ту  меборам ,

Ку  дашти  пурғубору  биёбонат ?

Лабташнаӣ   ба   соҳили  дарёҳо ,

Деҳ  як  нишон  зи  хушкии  домонат .

То  кай  сукут  мекунӣ  аз  андӯҳ ,

Акси  садои  ҳалби  туро  ҷӯям .

Ғулғӯла  кун  садои  маро  дар  кӯҳ ,

Чун  дардҳои   мардуми  ту   гӯям .

                                                      ГУЛБОД

                              Эй  Ватан ,  кошкӣ  бо  ёди  ту  бармегаштам ,

                               Шуда  лабрези  фараҳ  , шоди  ту  бармегаштам .

                               Дур   аз  чангу  ғуборат   дили  ман  меларзад ,

                               Кош  б ар  дашти  пур  аз  боди  ту  бармегаштам .

                               Линзаи  айнаки  ман  чанги  туро  гирад боз,

                               Боз  хурсанд   ба  гулбоди  ту  бармегаштам .

                               Ман  шунидам ,  ки   аҷаб  дилкашу  зебо  шудаӣ ,

                               Шоду  хуррам  ба  навободи  ту бармегаштам .

                               Ватани  гурду  далерони  шарафманд  туӣ ,

                               Чун   далерона   ба  фарёди  ту  бармегаштам .

                               Дилбаронат  ҳама  ширин  шудаанд  аз  Ширин ,

                               Кӯҳкан  гашта  чу  Фарҳоди  ту  бармегаштам .

                               Барҳ  аз  рӯзи  азал  буд  ба  оташкадаҳот

                               Барҳ  дар   сина   ба  бунёди  ту  бармегаштам .

https://sites.google.com/site/nukriddinimahkampur/_/rsrc/1321774812421/home/%D0%A7%D0%BE%D0%B9%D1%85%D0%BE%D0%BD%D0%B0.jpg?height=116&width=320

                                     УФУКХОИ РАНГБОР

Ман  меравам  ба  сӯи  уфуҳҳои  кӯдакӣ.

Он  ҷо,  ки  боз  тирукамон  ранг  мезанад,

Абри  гузар  чароғ  барафрӯзад  аз  карон,

В – он гаҳ  ба  раъду  барҳ  сад  оҳанг   мезанад.

Он  ҷо,  ки  лаҳзаҳои аҷиб  асту  бекарон,

Он  ҷо,  ки  зиндагист суруду  фасонаҳо.

Он  ҷо,  ки  фориғист  зи  ёди  ҳазини  дӣ,

Он  ҷо,  ки  сад   хаёл  расад  то  каронаҳо.

Он  ҷо,  ки  моҳ  ҳисса  бигӯяд  зи  рӯи  бом,

Он  ҷо,  ки  хоб рангиву  болу  парам  диҳад.

Парвоз  мекунам  ба  сӯи  уфуҳҳои  рангбор,

То  субҳидам, ки  каф  ба  сарам  модарам  ниҳад.

Он  ҷо,  ки  себи  сурх  ба  монанди  офтоб,

Аммо  ба  себ  ҳеҷ   ду  дастам  намерасад.

Он  ҷо,  ки  боғ  пур  зи  гули  сурху  марямист,

Аммо  ба  шохи гул  ҳади   пастам  намерасад.

Гар  як  ваҷаб  ҳадам  бигузорам  ба  сӯи  боғ,

Ман  мерасам  ба  арзи  уфуҳҳои  кӯдакӣ.

Оё  шавад, ки  боз  бар  он  рӯзҳо  расид

Бо  хотироти   олами  зебои  кӯдакӣ?

https://sites.google.com/site/nukriddinimahkampur/_/rsrc/1321900942262/home/%D0%9C%D0%B0%D0%BA%D1%82%D0%B0%D0%B1%D0%B8%20%D0%9C%D0%B0%D1%8A%D0%B4%D0%B0%D0%BD.jpg?height=240&width=320

                            ЗАНГИ ОХИР

Рӯзи   занги  охирини  мактабӣ,

Мо  ба  гирди  устодон   ғун  шудем.

Занги  охир   дошт  аз  барбат  наво,

Аз  фиғонаш  мо  ҳама  дилхун  шудем.

Ёдам  ояд  рӯзи   занги  охирин,

Саҳни   мактаб  дилкаш  аз  гул  гашта  буд.

Чеҳраи   ғамгини  ҳамсолони ман ,

Рангбозон   пуртаҳаммул  гашта  буд .

Рӯзи  занги  охирин  дил  мешикаст,

Гӯӣ  оҳанги  ҷудоӣ  менавохт.

Рӯзгоре  аз  назарҳо  мегузашт,

Занг  аз  он  маҳзун  навое  менавохт.

Ногаҳон  оғози  нопайдои  мо,

Бо  фиғоне    сӯи   поён  мерасид.

Рӯзгоре  лаҳзабахшон  мегузашт,

Дастҳо афшонда  бар  ишқу  умед.

Рӯзи  занги  охирин ояд  ба  ёд,

То ҳанӯз  оҳанги  ное  мекашам.

Менависам  шеъри  нағзи  «Ёд   бод!»,

Бар  ҳама  ёрону  хубу  дилкашам.

Кӯҳна  шуд  дафтарчаҳои  хотира

Ёди он даврон намудан мушкил  аст.

 Занги  охир  ишқро аз дил  рабуд ,

Ишқро аз нав сурудан мушкил  аст.

           Духтари хуршед

Ман аз аъмоқи гардун омадам боз,

Дар амвоҷи фурӯғи  равшанахтар.

Ба аҳли осмон, то барфурӯзам,

Ба  сурат  мекашам   симои модар.

Бубинам  чеҳраи  зебову мӯяш,

Ягона мӯниси ҷону диламро.

Ман уқёнусҳои ин Заминро,

Бигардам, то биёбам соҳиламро.

Чу киштӣ раҳ ба бандар бозгирад,

Барорад  аз  таҳи  дил  шӯру  фарёд.

Чунон аз ҳаҷри дурӣ ғусса дорад,

Ки дуд аз сар барорад, ғам зи бунёд.

Чу ман дер омадам,  бас дер гашта,

Сурудам  дар  лаб  охир  оҳи  дил  шуд.

Дилам  аз  дидаи  пазмони  модар,

Адо шуд, бенаво шуд, обу гил шуд.

Ҳама бори шукӯҳи модар умрест,

Ки бар сар мебарад, гарчӣ гарон аст.

Аз ин  рӯ  қоматаш  гаҳ  хам, гаҳе рост,

Аз ин  рӯ  гаҳ  чу  пиру  гаҳ  ҷавон  аст.

Ҳанӯз   ӯ  сабзаву  гул  мепарастад,

Ба  ҳар  ҷое  ман  ӯро   мепарастам.                                                                                                                                     Бувад  модар  бароям  духти  Хуршед

 Бигардам   даври  ӯ  то зинда  ҳастам

 Ман аз баҳру бари дунё гузаштам,

Гирифтам  ҳамчу киштӣ  самти бандар,

Чароғи раҳнамо  мехонад аз  дур,

Ба нури дидаи пазмони  модар.

                         НОМА  БА  МОДАР

Модар, саломи  ман  бипазир  аз  диёри   Рус

Ин  номаро  ба  хуни  дили  худ  навиштаам .

Як  ҳамдиёри  мо  хабар  овард  рӯзи  дӣ,

К-андӯҳгину  сахт  малӯлӣ  зи   ҳаҷри  ман,

З-ин   рӯ   ба  дил   сидонаи  андӯҳ   киштаам.

Ӯ  гуфт : « Модарат  таҳи  девори  хонаҳо,

Биншаста   рӯи  санг  туро  ёд  мекунад.

Дар  гиряҳост,  даст бароварда  бар само

Дар пеши  ҳавзу шаршараву  боғу  ҳавлиҳо

Номи  туро  гирифтаву  фарёд  мекунад.».

Ман   аз   ситораҳо,  ки   хамӯшӣ    гирифтаам,

Орому   бесадо   ҳамаро  гӯш   мекунам.

Пас   меравам   ба   соҳили   дарёи   пурхурӯш,

То  бар  каронаҳо  бифишонам   сиришки  ғам

Ҳиқ– ҳиқ  нишонда   гиряи  хомӯш  мекунам

Модар,  ман  аз  ту   хоҳиши  бисёр  мекунам  :

Дар  кӯчаҳо  мапурс  зи  ҳар  кас  ту  ҳоли  ман.

Бовар  макун  ту  бар  ҳама  нобудаву  дурӯғ ,

Бовар макун,  ки сокини   майхона  гаштаам

Бовар макун,  ки  ҳоли  ту  рафт  аз  хаёли  ман.

Дар  боли  абрҳои  пароканда  бар  ҷануб,

Як   рӯз  ман  ба  сӯи  ту  парвоз  мекунам.

Гар  душманони  ман  хабари  марги  ман  баранд,

Ман  мурда-мурда  мераваму  зинда  мешавам,

Зеро  ба  шавқи  рӯи  ту  парвоз  мекунам.

                                               Дубайти

                        Гули зеботар  аз  наргис, гули ноз,

                        Насими  гарм  дорад  шавқи  парвоз.

                        Азизам, мисли  ман   ошиқ  набошад,

                        Биё, ҳамроҳи  ман  бар  сӯи  Понғоз.

                                            ОҶАНГ 

Кош   пас   мегашт   ногаҳ   ақрабак

Лаҳзаҳо  дар  лаҳза  дармемонд   боз.

Моҳ  дар  як  шоха  андармон  шуда,

Шаб  ҳама  шаб  қиссаҳо    мехонд    боз.

            Модари   ман   қиссаҳои  моҳро

            Бо  танини  дил  ҳикоят   менамуд.

            Дар само  парвоз  мекардам   ба   хоб,

            Модари  ман  духтари  хуршед  буд.

Як сабад ноне,  ки меоварад ӯ,

Гармии хуршеду  бӯи  шир  дошт.

Дасти  худро  баркашида  аз  танӯр

Бо  навозиш  бар  сари  ман  мегузошт.

            Риштаҳои   кандаро   пайваста    ӯ,

            Нақше  аз  гулҳои  зебо  мекашид.

            Бо    палосаш    ҷодаи    хуршедро

            Аз   саҳар   бар   бегаҳиҳо   мекашид.

Лаҳзаҳо  дар  лаҳза нопайдо шуданд,

Модарам   хуршеди   тори  кӯҳ   шуд.

Қалби  ман  бар  вазни  кӯҳи  сарбаланд,

Ғам   гирифту  об   шуд, андӯҳ   шуд.

            Моҳ  бар  як  шоха  андармон  нагашт,

            Модарам  оҷанг  бар  рӯ  пир  шуд.

            Узри  ман дар пеши   ӯ  бо  эҳтиром,

            Дер  мондам, дур гаштам, дер шуд.

Лаҳзаҳо  бар пас   намегарданд   ҳеҷ,

Лаҳзае  дар  лаҳза  ҳаргиз  дарнамонд

Омадам  аз  роҳи  дуре   оқибат

Модарам  он  қиссаро  дигар  нахонд.

у марсияи пурсӯзи Нухриддини Маҳкампур, ки дар сӯгвории профессор, Доктори фанҳои техникӣ, шодравон, Абдуқаҳҳор Турсунов навишта буданд.

Равшангуҳару номгузорон ҳама рафтанд,

Бори сафар анбошта, ёрон ҳама рафтанд.

Он гарди парешоншудаи дашти гияҳсӯз,

Дорад асари он, ки саворон ҳама рафтанд.

Илм аст амал кардану андозашиносӣ,

Донодилу андешагуморон ҳама рафтанд.

Имсол насим атри гули сурх наовард,

Дардову дареғо, ки баҳорон ҳама рафтанд.

Хамӯча чӣ хомӯшу малоловару дилгир,

Пажмурда гули боғу ҳазорон ҳама рафтанд.

Понғоз дигар ғамкадаи дарду сукут аст,

Афсӯс, ки андӯҳгусорон ҳама рафтанд.

Аз ҳар варақе номаи дил пар накушояд,

Дардо, ки кунун номасупорон ҳама рафтанд.

Ишқ аст ба ҳар лаҳза дили хеш супурдан,

Дар ишқу вафо умрнисорон ҳама рафтанд.

⚘⚘⚘⚘⚘⚘⚘⚘

Ранги ту дигар дар ин чаман нест,

Бӯи хуши ту ба ҳар суман нест.

Дар сӯги ту ин бунафшазорон,

Пажмурда ба боғи ёсуман нест.

Аз дарди ту хун гирист лола,

Дар ҳар чамане, ки настаран нест.

Пироҳани порагаштаи гул,

Дар мотами ту ба ҷуз кафан нест.

Дар фазлу фазилат аз ту бартар,

Равшангуҳаре дар ин ватан нест.

Сад марсия бар ту менавиштам,

Аммо ба лабам зи ғам сухан нест.

Шеъре, ки зи тоби дил нахезад,

Донанд касон, ки шеъри ман нест.

Мухаммаси Мақсудалӣ бар ғазали Нухриддини Маҳкампур

————————————-

Бо шеваи ҳазор туро ёд мекунам,

Чун ошиқони зор туро ёд мекунам,

Бо қалби беқарор туро ёд мекунам,

“Оҳ, эй кӯҳандиёр, туро ёд мекунам,

Бо чашми интизор туро ёд мекунам”.

То фасли навбаҳори ту дил монда рӯи даст,

Бо ёди ту пурнолаам ин дам чу кабки маст,

Дур аз ту маро рӯзу шабам меравад ба шаст,

“Ман дил намеканам зи ту, меҳрат қадимӣ аст,

Ҳар ҷо, ба ҳар гузор туро ёд мекунам”.

Ҷашни Сада бигзаштаву донам, ки хуфтаӣ,

Бар зери барфи фасли зимистон нуҳуфтаӣ,

Бо майсаву бо сабза чу розат нагуфтаӣ,

“Шояд, ки дар Ҷануб дар авҷу шукуфтаӣ,

Бо авҷи навбаҳор туро ёд мекунам”.

Чандест, ки дур аз бари ту монда дар канор,

Чун фасли баҳорон сафарам, дида басо чор,

Бе боду ҳавои ту маро сина хору зор,

“Хуршед чун ба ноз нишинад ба кӯҳсор,

Аз пушти кӯҳсор туро ёд мекунам”.

Бо ёди туям гаҳ шаби хобро саҳар кунам,

Ёд аз чаманам созаму ду дида тар кунам,

Хоҳам, ки равам нола ба гури падар кунам,

“Дастам намерасад, ки зи даштат гузар кунам,

Дар роҳи пурғубор туро ёд мекунам”.

Гоҳо ба назар оядам он шамсу он қамар,

Гоҳо кунад аз дурӣ дили банда шӯълавар,

Бо қаҳ-қаҳа парранда биёрад зи ту хабар,

“Дар орзӯи диданат умре ба ҳар гузар,

Бо мардумони кор туро ёд мекунам”.

Бо дидани ту шод бигардам агар равам,

Дар дохили гулзори чаманзори ту давам,

З-он хоку санги поки ту бӯсам аз навам,

“Рӯзе дубора дар паи азми раҳат шавам,

Чун марди раҳсипор туро ёд мекунам”.

⚘⚘⚘⚘⚘⚘⚘⚘⚘⚘

Барнатобам чу ғами ғурбатҳо ,

Дар паи азми диёре бошам .

Солҳо дур бигаштам зи диёр ,

Ман кунун роҳсипоре бошам .

Он диёре , ки маро мехонад ,

Медиҳад акси садо бо кӯҳаш .

Гарчӣ андӯҳ ба дил афзояд ,

Беҳ зи шодӣ бувад он андӯҳаш .

Меравам сӯи деҳ аз шаҳри бузург ,

Боз дар кӯча ҳувайдо гардам.

Мардуми деҳ чу маро бишносанд ,

Ман ба худ гум шуда пайдо гардам .

Кӯҳсорон сари худ афрозанд ,

То бубинанд кӣ омад хандон .

Офтоб омада аз кӯҳи баланд ,

Муждаҳо медиҳад аз пайвандон .

Дӯстонам ҳама оянд , ки боз ,

То бисанҷанд худ оғӯши маро .

Омадам , шаршараҳо мехонад ,

Қиссаҳои лаби хомӯши маро .

Агар Шумо шоҳиди ҳодисаи ҷолибе шудед, видео ва акс бигиред ва бо ин шумора ба “Бомдод” фиристед. Шумораи мо (WhatsApp, Viber, IMO, Telegram): +420 777 404 854

One Comment

  1. Аз ин каламрав ахли калам рафт, Хар к-у алам шуд бо сад алам рафт. Бузургон хар кучо овора миранд, батадбираанду худ бечора миранд. Чавонмарганд мардони хунарманд, Валекин нокасон садсола миранд! Худованд рахмату магфират кунад!

Назари Шумо чист?

Шарҳҳое, ки дар он таҳқиру дашном ва ё иттилооти дурӯғ бошад, нашр карда намешаванд!

Back to top button