ВидеоРӯйдодҳои БадахшонЧеҳраҳо

МАНСАБИ НАВИ ЁДГОР ФАЙЗОВ: МУШОВИРИ БУНЁДИ ОҒОХОН БАРОИ ОСИЁИ МАРКАЗӢ

Ёдгор Файзов, раиси собиқи Вилояти Мухтори Кӯҳистони Бадахшон, ки моҳи 5-уми ноябри соли гузашта аз мақоми раиси ин вилоят барканор шуда буд, мансаби нав гирифтааст. Бино ба иттилои дарёфтии “Азия-Плюс” Ёдгор Файзов дар Бунёди Оғохон  (AKF) мушовир таъин шудааст

Ба иттилои манбаъи “Азия-Плюс” Ёдгор Файзов, тақрибан ду моҳ пештар мушовири Бунёди Оғохон барои Осиёи Марказӣ таъин шудааст.

“Аз рӯйи вазифа Ёдгор Файзов бояд дар дафтари марказии Бунёд дар Женева бошад, аммо дар ҳоли ҳозир ӯ кору вазифаашро аз Душанбе пеш мебарад”,-гуфт манбаи “Азия-Плюс”.

Ёдгор Файзов дар аввали моҳи ноябри соли 2021, пас аз се соли кор дар мақоми раиси ВМКБ аз вазифааш барканор шуд ва ин барканорӣ дар ҷомеаи Тоҷикистон сару садоҳои зиёдеро ба бор овард. Аз ҷумла дар шабакаҳои иҷтимоӣ барканории Файзов ба мавҷи вокунишҳои корбарон рӯ ба рӯ шуд.

Он замон ба ҷойи  Ёдгор Файзов Алишер Мирзонаботзода, ки то ин вақт дар симати раиси шаҳри Хоруғ кор мекард, таъин шуд, ки дар гузашта муовини раиси Кумитаи давлатии амнияти миллии Тоҷикистон ҳам буд.

Ёдгор Файзов, ки дар миёни мардуми Тоҷикистон ва ҷомеаи Бадахшон ба унвони раиси собиқи Бунёди Оғохон дар Тоҷикистон аз нуфузи зиёде бархӯрдор аст. Ӯ 1-уми октябри соли 2018, пас аз норизоятии Эмомалӣ Раҳмон, раисҷумҳури Тоҷикистон аз кори раҳбарии пешини ВМКБ, раиси ин вилоят таъин шуда буд.

Баъд аз раиси ВМКБ шудан, Файзов бо амалкардҳои барои ҷомеаи Тоҷикистон ғайримаъмул ва суханрониҳои бепардаву барои мардум ва расонаҳо дастрас буданаш, хеле маъруф шуд. Ӯ дар мусоҳибаҳои зиёде бо расонаҳо  ва ҳузури шахсияш дар даргириҳову гирдиҳамоиҳо ба яке аз мансабдорони мардумгаро ва қобили эътимод табдил ёфт.

Дар пайи барканории Файзов аз мақоми раиси ВМКБ 16-уми декабри соли 2021 ӯро аз узвият ва муовинати раиси Маҷлиси милл-палатаи болоии порлумони Тоҷикистон ҳам барканор карданд. 

Дафтари матбуоти Маҷлиси миллӣ он замон хабар дода буд, ки дар баробари масоили дигар, масъалаи “пеш аз муҳлат қатъ намудани ваколати узви Маҷлиси миллии Маҷлиси Олии Ҷумҳурии Тоҷикистон ва аз мансаби муовини Раиси Маҷлиси миллии Маҷлиси Олии Ҷумҳурии Тоҷикистон бозхонд намудани Файзов Ё.Д. баррасӣ шудааст”.

Баъди барканорӣ аз мақоми раиси ВМКБ, номи Файзов дигарбора пас аз ҳаводиси охири моҳи ноябри Роштқалъву Хоруғ сари забонҳо шуд. Пас аз куштани шудани Гулбиддин Зиёбеков як сокини ноҳияи Роштқалъа дар як амалиёти неруҳои қудратиии Тоҷикистон ва бар пай он сар задани эътирозҳои 4-рӯза дар Хоруғ, мақомоти қудратӣ дар ТВ “Бадахшон” як филми мустанадро нашр карданд, ки дар он мақомоти дар бораи омилҳои ҳодиса ва гунаҳкорони он ҳарф мезаданд.

Ёдгор Файзов, ба унвони раиси собиқи вилоят дар ин филм баёнот дода буд ва бархе аз паҳлӯҳои норӯшани қазияро шарҳ дода буд.

Манбаъhttps://asiaplustj.info/tj/news/tajikistan/society/20220316/mansabi-navi-yodgor-faizov-mushoviri-bunyodi-oohon-baroi-osiyoi-markaz

Агар Шумо шоҳиди ҳодисаи ҷолибе шудед, видео ва акс бигиред ва бо ин шумора ба “Бомдод” фиристед. Шумораи мо (WhatsApp, Viber, IMO, Telegram): +420 777 404 854

Назари Шумо чист?

Шарҳҳое, ки дар он таҳқиру дашном ва ё иттилооти дурӯғ бошад, нашр карда намешаванд!

Back to top button