Баъди занозаниҳои гуруҳӣ байни муҳоҷирони тоҷику қирғиз, ки рӯзҳои 8-9 март дар сохтмони корхонаҳои бузурги Корхонаи коркарди гази Амур (Амурский ГПЗ) ва Маҷмаи газу кимиёвии Амур (АГХК) рӯй дод, маъмурия ти АГХК якбора 182 зодаи Қирғизистонро аз кор ҷавоб дод. Дар рӯйхатти пешшудаҳо, ки як нусхааш рӯзи 11 март ба дасти идораи пойгоҳи хабарии “Бомдод” низ расид, коргароне афтодаанд, ки бархеаш ним сол боз инҷо кормекарданд ва бархеи дигараш ҳамагӣ чанд рӯз пеш ба кор сар карда буданд. Синни коргарони пешшуда аз 19 то 50 сол аст. Барои мисол, коргари аз ҳама калонсоли пешшуда Майрамбек Эшалиев, санаи таваллудаҳ 8 ноябри соли 1972, дар қитъаи корҳои монолиту бетон (участок монолитно-бетонных работ (ВСМ) кор мекард. Аксари коргарони пешшуда дар ҳамин қитъаи ВСМ кор мекарданд, аз ҷумла ҷавонтарини онҳо Олимбек Норқулов, санаи таваллудаш 1 майи соли 2003 ва Қуралбек уулу Адолат, ки 10 декабри соли 2003 ба дунё омада, ҳамагӣ 3 моҳ пеш ба синни 18 расида буд.
Дар бораи онки оё аз муҳоҷирони тоҷик низ касеро барои он занозаниҳо аз кор пеш карданд ё на?, маълумоте ҳаз нарасидааст. Манобеи “Бомдод” хабар доданд, ки баъди занозании рӯзҳои 8-9 март ба хотири пешгирӣ аз занозаниҳои нав коргарони тоҷикро аз хобгоҳи корхона муваққатан ба як меҳмонхона кӯчонданд.
Тавре қаблан хабар додем, рӯзҳои 8-9 март дар сохтмони корхонаи коркарди гази Амур (Амурский ГПЗ) байни муҳоҷирон аз Тоҷикистону Қирғизистон занозаниҳои оммавӣ рӯй дод. Ин корхона дар канори шаҳри Благовешенск, маркази маъмурии вилояти Амур, дар минтақаи Шарқи дури Русия сохта мешавад ва ба сохтмони он танҳо дар ширкати “ВелесСтройМонтаж” 9 ҳазор коргар, аксар муҳоҷирон аз кишварҳои Осиёи Марказӣ ба кор гирифта шудаанд.
Манобеи пойгоҳи хабарии “Бомдод” бо ирсоли видеоҳои ду рӯзи занозаниҳо, хабар доданд, ки
бетартибиҳо рӯзи 8 март дар ошхонаи ширкати “ВелесСтройМонтаж” дар як заминаи сирф маишӣ, ё ба қавли тоҷикҳо, барои як гапи дупула сар шуд. Коргарони тоҷик гӯё пеш ҳам аз тарзи хидматрасонии кормандони ошхона, ки бештараш занони зодаи Қирғизистон будаанд, норозигӣ карда, мегуфтаанд, ки гӯё пешхидматҳои қирғиз ба ҳамватанҳои худ хӯроки бештар дода, ба коргарони тоҷик баракс кам медиҳанд.
Рӯзи 8 март бошад, гӯё як коргари тоҷик аз зани пешхидмати қирғиз салфетка хостааст ва ӯ ин салфеткаро ё надодааст, ваё додаасту вале ба зарда ба рӯи коргари тоҷик партофтааст.
Дар ҳар сурат, ин нофаҳмии ночиз билофосила ба як ҷанҷоли бузург бо иштироки садҳо нафар аз ҳарду тараф табдил ёфтааст. Дар видеои рӯзи аввали занозанӣ дида мешавад, ки муҳоҷирон ба сӯи якдигар ҳама чизе, ки пеш меояд, аз ҷумла мизу курсӣ ва косаву табақ ва дигар зарфу ашёро мепартоянд ва якдигарро зери борони мушту лагат мегиранд.
Рӯзи 9 март муҳоҷирони тоҷику қирғиз дубора аз гиребони якдигар гирифтанд, вале ин дафъа дар саҳни барфпӯши майдони сохтмон.
Баъди рӯзи дуюм ҳам такрор шудани занозаниҳо, маъмурияти ширкати “ВелесСтройМонтаж” тасмим гирифтааст, ки масъаларо бо чораҳои шадид ҳал кунад. Манобеи “Бомдод” хабар доданд, ки маъмурият қарор кардааст, ки тамоми муҳоҷирони дар занозаниҳо иштироккардаро бидуни ягон чуну чаро аз кор берун биандозанд. Маъмурият ҳамчунин гуфтааст, бо мақомоти ҳифзи ҳуқуқ масъалаи аз Русия ихроҷ кардани муҳоҷирони шӯрапуштро ҳам матраҳ мекунад.
Қарори маълум, моҳи августи соли 2021 дар пайи як силсила занозаниҳои байни муҳоҷирон дар минтақаҳои гуногуни Русия, ВКД ин кишвар ҳушдор дод, ки аз ин ба баъд муҳоҷиронро барои дағалона вайрон кардани тартиботи ҷамъиятӣ, аз ҷумла барои иштирок дар занозаниҳо бераҳмона ба кишварҳои зодгоҳашон ихроҷ карда, аз ҳаққи убури марзи Русия маҳрум мекунанд.
Моҳи декабри соли 2021 ВКД Русия хабар дод, ки алакай беш аз 400 муҳоҷирро маҳз барои иштирок дар занозаниҳои оммавӣ ихроҷ кардаанд. Аксари онҳоро ба муҳлати то 40 сол аз ҳаққи убури марзҳои Русия маҳрум карданд.