ВИДЕОИ ЛАҲЗАИ ТИРАНДОЗӢ БА МОШИНИ БОҚИР ДАР ХОРУҒ
Ба идораи пойгоҳи хабарии “Бомдод” аз Хоруғ видеои кӯтоҳеро фиристоданд, ки мегӯянд, дар он лаҳзаи тирандозӣ ба тарафи мошини Мамадбоқир Мамадбоқиров (Боқир), яке аз лидерҳои ғайрирасмии Вилояти Мухтори Кӯҳистони Бадахшон сабт шудааст. Дар ин ин сабт, ки ҳамагӣ 6 сония давом мекунад, дида мешавад, ки як мошини рангаш сафеди “ҷип” мошинҳои дигарро ақиб гузошта, бо шаст аз назди посгоҳ мегузарад ва аз қафояш садои як тир баланд мешавад.
Қаблан хабарҳое ба даст расид, ки субҳи 4 март дар назди бинои расати КДАМ дар Хоруғ ҳангоми писарашро ба дарс ба литсейи Оғохон бурдани Боқир кӯшиши боздошти вай сурат гирифтааст, вале бо вуҷуди тирпарронии мақомот ба ин лидери ғайрирасмии минтақа муяссар шудааст, ки фирор кунад. Боқир баъдан ба Радиои Озодӣ гуфт, ки аз дасти росташ тир хӯрд, вале тир ба устухон нарасидааст ва захмаш сабук аст. Ӯ гуфт, тарафдоронашро, ки дар пеши хонааш ҷамъ шуданд, аз ташкили тазоҳурот манъ карда, гуфтааст, ки ин масъаларо худаш ҳал мекунад.
Ва аммо сардори раёсати корҳои дохилии Бадахшон Шариф Назарзода гуфт, ба онҳо дар бораи чунин як ҳодиса маълумоте нарасидааст. Муовини ӯ Аъзам Толеҳзода баъдан гуфт, ки Боқир ягон хел тир нахӯрдааст. Ба гуфтаи Толеҳзода, кормандони БДА мошини Боқирро дар посгоҳ манъ карданд, ӯ наистод ва аз ин рӯ, як тир ба ҳаво холӣ карданд. “Тафтиш бурдем, захмӣ нашудааст, дурӯғ аст. Дар хонааш аст”, гуфт Толеҳзода ба Радиои Озодӣ
БОҚИР ГУФТ, ДАР НАТИҶАИ ҲАМЛАИ СУБҲИ 4 МАРТ АЗ ДАСТАШ ТИР ХӮРДААСТ (САДО)
Мамадбоқир Мамадбоқиров (Боқир), яке аз лидерҳои ғайрирасмии Вилояти Мухтори Кӯҳистони Бадахшон хабари мавриди ҳамлаи мусаллаҳона қарор гирифтанашро тасдиқ кард ва гуфт, аз дасташ тир хӯрдааст. Боқир рӯзи 4 март ба Радиои Озодӣ гуфт, ҳангоми ҳаракат ба маркази Хоруғ дар яке аз посгоҳҳо ба сӯяш ҳамла сурат гирифт. “Писарам низ дар мошин буд. Тир ба дасти ростам бархӯрд. Устухон зарар надидааст. Як духтури шинос ҷароҳатро баст,” — гуфтааст ӯ.
Боқир ҳамчунин гуфт, баъди ин ҳодиса мардум дар назди хонааш ҷамъ омада буданд, вале ӯ аз ҳама хост, ки барои ин даст ба ҳеч коре назананд, худаш ҳал мекунад.
Ин ҳамла дар ҳоле сурат гирифт, ки мақомот беш аз як моҳ боз аз Боқир талаб доранд, ки ба тафтишот ҳозир шавад. Ӯ дар суҳбат бо Озодӣ тасдиқ кард, ки ин талабро рад кардааст.
“Ба ман гуфтанд, ки таслим шавед, ҷарима мекунем ва пулро ҳам худамон месупорем. Қабул накардам. Ҳатто вохӯрӣ бо ягон генералро қабул накардам”, – гуфтааст ӯ.
Дар ҳамин ҳол, Шариф Назарзода, сардори Раёсати корҳои дохилии Бадахшон ба Озодӣ гуфтааст, аз ҳодисаи ҳамла ба Боқир хабар надоранд. “Ба мо дар ин бора ягон муроҷиат нашудааст,” – гуфтааст генерал Назарзода, ки тоза чанд рӯз пеш ба ҳайси сардори милитсияи вилоят аз Душанбе ба Бадахшон фиристода шуд.
<iframe src=”https://www.ozodi.org/embed/player/0/31735785.html?type=audio” frameborder=”0″ scrolling=”no” width=”100%” height=”144″ allowfullscreen></iframe>
Қаблан Pamir Daily News, пойгоҳи хабарие, ки ҳаводиси Бадахшонро пайгирӣ мекунад, бо такя ба манобеи худ хабар дод, ки афроди либоси мулкӣ дар тан субҳи 4 март дар наздикии бинои раёсати Кумитаи давлатии амнияти миллӣ (КДАМ) дар Хоруғ кӯшиш кардаанд, ки пеши роҳи мошини Боқирро бигиранд.
Як манбаи ин нашрия гуфт: “Ин ҳодиса вақте рӯй дод, ки Мамадбоқиров фарзандонашро ба дарс ба литсейи Оғохон, ки дар наздикии бинои КДАМ ҷойгир шудааст, мебурд. Дар роҳ як мошини номаълум кӯшиш кардааст, ки роҳи Боқирро бандад, вале ӯ тавонистааст, ки аз он убур кунад. Баъди ин афроди ношиноси либоси мулкӣ дар тан аз мошин баромада, ба тарафи мошини Боқир тир паррондаанд”. Аммо шоҳиди дигари ҳодиса гуфтааст, ки он нафарон ба ҳаво тир холӣ карданд, на ба сӯи мошини Боқир.
Маълум нест, ки он нафароне, ки кӯшиши боздошти Боқирро карданд, аз кадом ниҳоди қудратӣ буданд? Мақомоти расмӣ то кунун ин ҳодисаро шарҳ надодаанд.
Мамадбоқир Мамадбоқиров (Боқир), яке аз лидерҳои ғайрирасмии Бадахшон, аз фармондеҳони собиқи Иттиҳоди нирӯҳои мухолифини тоҷик аст, ки баъди имзои созишномаи сулҳи сорли 1997 аз ҳисоби квотаи сифоизаи мухолифин фармондеҳи як қисми ҳарбии нирӯҳои марзбонӣ таъйин шуд ва соҳиби рутбаи полковник шуд.
Ба зидди Боқир ахиран бо иттиҳоми таҳқир ва латтукӯби намояндаи давлат парвандаи ҷиноятӣ кушодаанд. Раиси идораи маорифи вилояти Бадахшон Лутфулло Наврӯзов Боқирро ба он айбдор кард, ки гӯё шоми 29 январ ӯро таҳқиру латтукӯб карда ва аз хонааш дар қабати болоии бинои идораи маориф, ки дар маҳаллаи Бархоруғ, маҳалли зисти Боқир ва аксари тарафдоронаш ҷойгир шудааст, рондааст. Боқир таҳқиру латтукӯби Наврӯзовро рад мекунад ва мегӯяд, “бо муаллим танҳо як суҳбати падарона кардам”. Боқир мегӯяд, ки Наврӯзов ӯро тавассути ТВ бе ягон асос “террорист” номид ва муаллимони дигарро ҳам маҷбур мекард, ки аз тариқи ТВ ба зидди Боқир ва дигар лидерҳои ғайрирасмии Бадахшон гап зананд. Мақомот ин лидерҳои ғайрирасмӣ, аз ҷумла Боқирро “саркардагони гуруҳҳои муташаккили ҷиноӣ” ном мебаранд.
Мақомоти ҳифзи ҳуқуқ дар пайи кушодани парвандаҳои ҷиноятӣ ба зидди Боқир ва тарафдоронаш аз вай талаб доранд, ки ба тафтишот ҳозир шавад ва ҳамчунин 6 сокини дигари Бархоруғро, ки ба латтукӯби кормандони милиса ва амният дар рӯзҳои эътирозҳои 25-28 ноябр дар Хоруғ айбдор мешаванд, бисупорад. Боқир ин талабро қабул накард ва инак беш аз як моҳ боз сокинони Хоруғ нигарони роҳандозии амалиёти махсус барои боздошти Боқиру тарафдорони ӯ мебошанд. Сокинон барои мамониат ба ин, дар роҳҳое, ки ба сӯи хонаи Боқир мебаранд, навбатдории шабонарӯзӣ ташкил кардаанд.