ВидеоИқтисод

НАРХИ РОҲКИРОИ НАҚЛИЁТИ ҶАМЪИЯТӢ ДАР ДУШАНБЕ ДАСТИКАМ 50 ФОИЗ БОЛО РАФТ

Бо қарори муассисаи давлатии  “Душанбенақлиётхадамотрасон” аз 10 ноябр ҳаққи роҳкиро дар шабакаи хатсайрҳои шаҳри Душанбе камаш 50 фоиз боло бурда шуд. Акнун роҳкиро барои як мусофир ба таври ғайринақдӣ тавассути автобусҳо  1 сомонию 80 дирам ва тариқи кортҳои яксафара 2 сомонию 50 дирам, троллейбусҳо ба таври ғайринақдӣ 1 сомонию 50 дирам ва тариқи кортҳои яксафара 2 сомонӣ, микроавтобусҳо 2 сомонию 50 дирам ва барои интиқоли як мусофир-километр тавассути воситаҳои нақлиёти кироякаш (таксӣ) 3 сомониро ташкил медиҳад. Шаҳрдории Душанбе қаблан гуфт, ки нархи нақлиёт дар мувофиқа бо хадамоти зиддиинҳисорӣ боло бурда шудааст.

Ин тасмим ба мавҷи интиқодҳо ва вокунишҳои манфии сокинони пойтахти Тоҷикистон рӯбарӯ шуд, ки мегӯянд, мақомот нархро беш аз ҳадди имконоти мардум боло бурдаанд.

Вале «Душанбенақлиётхадамотрасон» мақсад аз  баланд намудани тарифҳои ҳамлу нақли мусофирон дар хатсайрҳои шаҳри Душанберо “пурра қонеъ гардонидани эҳтиёҷоти аҳолӣ бо хизматрасонии нақлиётӣ, баланд бардоштани сатҳу сифати хизматрасонӣ ба мусофирон ва дар ин замина муътадил гардонидани вазъи молиявии корхонаҳо ва ширкатҳои нақлиётӣ” номи гуфт, 10 сол нархи нақлиёт дар пойтахт тақрибан бидуни тағйир боқӣ монда буд.

Ин корхона гуфт, ки  бори охир роҳкиро дар нақлиёти ҷамъиятии  Душанбе соли 2011 тағйир ёфта,  дар автобусҳо барои як мусофир 1 сомонию 20 дирам, троллейбусҳо 70 дирам ва микроавтобус 1 сомонию 60 дирам муқаррар гардида, давоми 10 сол дигар бетағйир монда, танҳо  роҳкирои троллейбус як маротиба аз 70 дирам то ба 1 сомонӣ боло бурда шуда буд.

Ин дар ҳолест, ки ба гуфтаи корхонаи “Душанбенақлиётхадамотрасон”, дар ин 10 сол нархи сӯзишворӣ ва равғанҳои молиданӣ ва қисмҳои эҳтиётии воситаҳои нақлиёт беш аз 2  маротиба, нархи  қувваи барқ 300 фоиз боло рафта,  нархи воситаҳои нақлиёт,  инчунин андоз ва маоши кормандони соҳаи нақлиёт ба маротиб боло рафтааст. “Корхона ва ширкатҳои мусофирбарии нақлиётӣ хароҷоти худро рӯйпӯш карда наметавонанд ва боиси қарздории онҳо гардида истодааст”, гуфта мешавад дар иттилоияи корхона. “Душанбенақлиётхадамотрасон” афзудааст, ки маблағгузорӣ аз ҳисоби буҷаи шаҳр барои муътадил нигоҳ доштани вазъи молиявиашон “басанда набуда, зарурати тағйир додани нархномаи роҳкиро ба миён омадааст.”

Аммо сокинон мегӯянд, дар вақти боло бурдани нарх бояд вазъи иҷтимоии мардум низ ба назар гирифта мешуд, ки нашуд…

Агар Шумо шоҳиди ҳодисаи ҷолибе шудед, видео ва акс бигиред ва бо ин шумора ба “Бомдод” фиристед. Шумораи мо (WhatsApp, Viber, IMO, Telegram): +420 777 404 854

Назари Шумо чист?

Шарҳҳое, ки дар он таҳқиру дашном ва ё иттилооти дурӯғ бошад, нашр карда намешаванд! Required fields are marked *

Back to top button