ЯК ЗАНРО ДАР ХОНАИ АЗИЗУЛЛО СОҲИБОВ АЗ ГАРДАНАШ БО КОРД ЗАХМӢ КАРДААНД
С.О., як зани 36-сола, 10 рӯз пеш дар ҷараёни як ҳодисаи мармуз дар хонаи Азизулло Соҳибов, раиси “Тоҷикматлубот”-и вилояти Хатлон аз гарданаш захми корд бардошта, ду рӯз пеш аз бемористони Қараболои шаҳри Бохтар ҷавоб дода шудааст. Дар ин бора рӯзи 20 октябр Радиои Озодӣ бо такя ба чанд манбаи худ дар мақомоти интизомиву тандурустии вилояти Хатлон хабар дод.
Ба иттилои манбаъҳои радиои Озодӣ, С.О. шоми 10 октябр аз як хона дар маҳаллаи Ломоносови шаҳри Бохтар ба бемористони вилоятӣ, маъруф ба бемористони Қараболо бурда шуд. Ба гуфтаи манобеи Озодӣ, “ин зан аз дӯстони Азизулло Соҳибов будааст”.
Худи Соҳибов то ин дам қазияро шарҳ надодааст.
Ба гуфтаи ҳамсоягон, шоми 10 октябр, пеш аз сар задани ҳодиса, дар хонае, ки аз он Азизулло Соҳибов истифода мекунад, “чанд зану мард ворид шуда, зоҳиран аз дохили бино садои хурсандӣ берун меомад”. Яке аз шоҳидон гуфтааст, “пас аз чанде садои доду вой баланд шуд ва пас аз бурдани зани оғуштаи хун он ҷо кормандони милиса ҳозир шуданд.” Маълум нест, ки онҷо чӣ шабнишинӣ буд ва С.О. бо Азизулло Соҳибов чӣ робита дорад?
Ба табибони беморхона ҳангоми овардани зани маҷруҳ гуфтаанд, ки “ӯ қасди худкушӣ кард”.
Дар шуъбаи корҳои дохилии шаҳри Бохтар рӯзи 19 октябр ба Радиои Озодӣ гуфтанд, ки чунин ҳодисаро сабт накарданд, вале як корманди огоҳ дар мақомоти интизомии Хатлон бо шарти фош нашудани ном гуфт: “Аз рӯи таҳқиқи ибтидоӣ ва гуфтаи шоҳидон, Азизулло Соҳибов ба зан ҳамла кардааст. Кормандони милисаи шаҳрӣ рафтанд, таҳқиқи ҳодисаро оғоз карданд, вале ҳозир касе даъво надорад.”
Рӯзи 20 октябр дар шуъбаи милисаи Бохтар расман ҳодисаро тасдиқ кардаанд, вале гуфтаанд, “онро Раёсати корҳои дохилии вилояти Хатлон таҳқиқ дорад.” Дар РВКД Хатлон баракс гуфтаанд, ки “ҳодиса дар ҳудуди Бохтар рӯй додааст ва масъулияти таҳқиқаш ба дӯши онҳост.”
Як духтури бемористони Қараболо бе зикри ном ба Радиои Озодӣ гуфт, ин зан се рӯз дар шуъбаи эҳёгарӣ ва 5 рӯзи дигар дар утоқи умумӣ табобат гирифтааст. “Мо намедонем, ба ӯ чӣ шудааст. Фақат вазифаамонро иҷро кардем. Гарданаш бо корд бурида шуда буд, онро дӯхтем. Ду рӯз шуд, аз беморхона ҷавоб шудааст, вале ҳанӯз барои канда гирифтани риштаҳо наомадааст. Бояд як бори дигар ояд, то риштаҳо гирифта шаванд”, — гуфтааст ин пизишк.
Азизулло Соҳибов дар шаҳри Бохтар (Қӯрғонтеппаи собиқ) зиндагӣ мекунад ва солҳо боз раиси ҷамъияти “Тоҷикматлубот”-и вилояти Хатлон аст. Ӯ 50 сол дошта, бародари Мамазоир Соҳибов, домоди калонии президенти Тоҷикистон ва амаки Шамсулло Соҳибов, домоди дигари Эмомалӣ Раҳмон аст. Исми ӯ дар навори хабарҳои криминалӣ аз ин қабл ҳамагӣ як маротиба соли 2019 вақте пайдо шуд, ки БДА бо нашри рӯйхатти ронандагони аз «Шаҳри бехатар” қарздор гуфт, ронандаи «Лексус-570” Азизулло Соҳибов, рақами мошинаш 1111РР03, пули 81 ҷаримаро пардохт накардааст. Дар асноди ВКД Азизулло Соҳибов сокини шаҳри Бохтар, кӯчаи Свириденко, 85 зикр шудааст.
Хонаводаи Соҳибовҳо бо далели наздикӣ ба Эмомалӣ Раҳмон, президенти Тоҷикистон, аз нуфузи хосе дар кишвар, бахусус дар қисмати водии Вахши вилояти Хатлон бархӯрдоранд. Ду намояндаи ин хонавода: Мамазоир Соҳибов ба духтари калонии президент Фирӯза ва бародарзодаи ӯ Шамсулло Соҳибов ба духтари чорумаш Парвина Раҳмон издивоҷ кардаанд.
Соҳибовҳо соҳиби даҳҳо навъи тиҷорат дар Тоҷикистонанд. Бозори бузурги “Ҳоҷӣ Шариф” дар шаҳри Бохтар ва ширкати “Фароз”, ки ҳоло бо номҳои дигар даҳҳо навъи тиҷоратро монополияи худ кардааст, ба ҳамин хонавода тааллуқ доранд.