ПИСАРИ КАРОМАТ ШАРИПОВ ПАСПОРТҲОИ 110 МУҲОҶИРИ ТОҶИКРО ДАР ВОРОНЕЖ АЗ ДАСТИ КОРФАРМО ГИРИФТААСТ (ВИДЕО)
Ба дасти идораи пойгоҳи хабарии “Бомдод” видеое расид, ки дар он муҳоҷирони тоҷик дар ноҳияи Острогожски вилояти Воронеж ба Парвиз ва Шаҳоб ном нафарон барои аз дасти корфармояшон гирифта додани паспортҳои онҳо изҳори сипос мекунанд. Бино ба иттилои дарёфтӣ, Шаҳод писари Каромат Шарипов, ҳомии шинохтаи ҳуқуқи муҳоҷирони тоҷик аст.
Ҷамила, як зани тоҷик, ки бо суханронии пурҳарораташ дар бора шароти ғуломӣ афтодани ин 110 муҳоҷир вирди забонҳо шуда буд, дар ин видео низ аз номи муҳоҷирони фиребхӯрда суханронӣ мекунад ва паспорташро дар даст алвонҷ дода, бо шодӣ мегӯяд: “Нав гашта гражданин шудам!”
Каромат Шариповро 4 сол пеш аз Русия депорт карданд ва ӯ соли 2020 дар Тоҷикистон аз олам чашм пӯшид. Писари ӯ Шаҳоб чанде пеш эълон кард, ки роҳи падарашро давом медиҳад ва ба ҳимоят аз ҳуқуқи муҳоҷирони тоҷик машғул хоҳад шуд.
Як рӯз қабл сафорати Тоҷикистон дар Русия низ хабар дод, ки субҳи 15 октябр намояндагонашро барои расидагӣ ба аҳволи 110 муҳоҷири фиребхӯрдаи тоҷик ба Воронеж фиристодааст.
Ин муҳоҷирон рӯзи 13 октябр дар назди шуъбаи пулиси ноҳияи Острогожск ҷамъ шуда, шикоят карданд, ки як корфармои беинсоф онҳоро ҳанӯз дар поёни моҳи июл барои чидани себ аз Тоҷикистон ба деҳаи Шубное оварда, шиносномаҳои ҳамаашонро кашида гирифтааст ва онҳоро амалан дар ҳолати ғуломӣ қарор дода, пулашонро намедиҳад.
Видеои шикоятҳои пуралами онҳо дар Интернет сару садои зиёд ба бор овард ва корбарон аз мақомоти масъули Тоҷикистон, аз ҷумла аз сафорат ва намояндагӣ талаб карданд, ки ба аҳволи ин мардум расидагӣ кунанд.
Дар видео муҳоҷирони тоҷик як як дар пеши камера мегӯянд, ки барои 4 моҳи корашон дар инҷо ҳамагӣ 5 ило 10 ҳазор рубл гирифта, бархеашро корфармо ба болои бепул кор фармуданаш боз қарздор ҳам кардааст.
“Ақалан ҳуҷҷатҳоямонро намедиҳанд, ки пеш аз расидани зимистон як ҷоямонро пайдо кунем”, алам мекунад як муҳоҷири солхӯрдаи тоҷик.
Дар байни муҳоҷирони фиребхӯрда занон ҳам зиёд будаанд. Яке аз онҳо бо номи Ҷамила мегӯяд, “сару либоси дуруст надорем. Либосҳои кӯҳнаи русҳоро мепӯшем. Моро дастгирӣ кунед. Аз пеши фиребгарҳо баред…”
Яке муҳоҷири дигар аз ин гуруҳ гуфтааст, “чор моҳ шуд, ки асирем. Ҳоле, ки мо дорем, саг надорад. Саги кӯча соҳиб дораду мо не.”
Пулиси Острогожск ҳам гуфтааст, ки муроҷиати муҳоҷирони тоҷикро таҳқиқ мекунад.
Ҳар сол беш аз як миллион нафар аз аҳолии қобили кори Тоҷикистон барои таъмини зиндагии хонаводаҳои худ ба ҷустуҷӯи кор ба Русия мераванд. Садҳо нафари онҳо ҳар сол дар Русия қурбони фиреби корфармоёни беинсофе мешаванд, ки муҳоҷирони тоҷикро моҳҳо кор фармуда, пулашонро намедиҳанд. Ҳолатҳое ҳам буд, ки корфармоён бо мақомоти фасодзада якҷо амал мекарданд ва пеш аз ҳисобу китоб пулис муҳоҷирони тоҷикро аз Русия депортатсия мекард, ки пули худро аз корфармо гирифта натавонанд ва ҳатто имкони даъво наёбанд.