ҲАЛОКАТИ БОБОЮ НАБЕРА ДАР ЯК САДАМАИ ВАЗНИН ДАР ИСФАРА
Рӯзи 5 октябр, соати 14 бар асари ба мошини боркаши ГАЗ-330210 бархӯрдани як мошини “Опел Зафира” дар роҳи Кучкак-Исфара-Гулистон ронандаи “Опел” -сокини 63-солаи Исфара ва набераи 10-солааш дар ҷои ҳодиса ба ҳалокат расида, 4 нафари дигар, аз ҷумла боз як набераи сесолаи ронандаи “Опел” ҷароҳат бардоштаанд.
Маркази матбуоти ВКД Тоҷикистон хабар дод, ки 5-уми октябри соли 2021, тахминан соати 14:00, ронандаи автомашинаи тамғаи «Опел-Зафира», Ҷалолов Ҳомидҷон, соли таваллудаш 1958, сокини шаҳри Исфара, ҳангоми ҳаракат дар роҳи мошингарди «Кучкак-Исфара-Гулистон» аз уҳдаи идораи воситаи нақлиёт набаромада, ба автомашинаи тамғаи «ГАЗ-330210», таҳти идораи ронанда, Партовов Саидмаҳмад Давлатович, соли таваллудаш 1983, сокини ноҳияи Мастчоҳ, бархӯрдааст.
Дар натиҷа, ронандаи автомашинаи тамғаи «Опел-Зафира», Ҷалолов Ҳ. ва набераи хурдсолаш Ҷалолов Муҳаммадюсуф Муҳиддинович, соли таваллудаш 2011, ҷароҳатҳои гуногуни ҷисмонӣ бардошта, дар ҷойи ҳодиса ба ҳалокат расидаанд.
Мусофирони дигари автомашинаи мазкур: Ҷалолова Замира Раҳимовна, соли таваллудаш 1963 ва Ҷалолова Зарина Абдуҷабборовна, соли таваллудаш 1994, хурдсол Ҷалолов Аъзамҷон Муҳиддинович, соли таваллудаш 2018, сокинони ҳамон ҷо ва ронандаи автомашинаи тамғаи «ГАЗ-330210» Партовов С.Д. ҷароҳати ҷисмонӣ бардошта, дар беморхона бистарӣ гардидаанд.
Аз рӯи ин ҳодиса таҳқиқот идома дорад.
Ҳар сол бар асари садамаҳо дар роҳҳои Тоҷикистон садҳо нафар ҳалок ё маҷруҳ мешаванд. Аз ҷумла соли 2020 бар асари садамаҳо дар роҳҳои Тоҷикистон 375 нафар ба ҳалокат расида, беш аз 1200 нафар маъюб шудаанд. Дар нимаи аввали соли 2021 дар роҳҳои Тоҷикистон 151 нафар дар садамаҳои нақлиётӣ ҷон бохтаанд.