МАРЯМ ИСОЕВАРО ДАР АРАФАИ ИД АЗ БЕМОРИСТОН ҶАВОБ ДОДААНД. ҲУНАРПЕШАИ МАЪРУФ АЗ КОРОНАВИРУС ШИФО ЁФТААСТ (3 АКС)
Беморхонаи клиникии шаҳрии бемориҳои сироятии ш.Душанбе, воқеъ дар касабаи Зарафшон, дар саҳифааш дар Фейсбук хабар дод, ки Ҳунарпешаи халқии Тоҷикистон Марям Исоеваро рӯзи 19 июл, дар арафаи иди Қурбон аз бемористон ҷавоб додаанд.
“Имрӯз (19 июл) як собиқадори меҳнат, ҳунарпешаи театр ва синамои тоҷик, Ҳунарпешаи халқии Тоҷикистон Марям Исоева, ки бо нишонаҳои бемории короновирус бистарӣ буд, дар беморхонаи маскур ва таҳти назорати табибон ва махсусан профессори кафедраи бемориҳои сироятӣ Раҳмонов Э. Р ва сартабиби беморхона Ҳабибзода Х.Х ва табиби ҷавон Иронов Озар қарор дошт, худи ҳамин рӯз ҳунарпешаи театр ва синамои тоҷикро пас аз кӯшишу заҳмати зиёд бо як рӯҳияи баланд аз тарафи профессор Рахмонов ва сартабиби беморхона ва табибону ҳамшираҳо баьди барқарор шудани саломатиаш ба хонааш ҷавоб дода шуд”, – гуфта мешавад дар иттилоияи расмии бемористон.
Марям Исоева аз аввалҳои моҳи июл дар бемористони бемориҳои сироятӣ дар касабаи Зарафшон аз коронавирус табобат мегирифт. Рӯзи 10 июл, дар пайи шикояти ӯ аз шароити табобаташ бо супориши вазири тандурустӣ Ҷамолиддин Абдуллозода муовини вазир Шодихон Ҷамшед аз ин беморхона боздид ва шахсан бо Марям Исоева суҳбат кард.
Маркази матбуоти вазорати тандурустӣ хабар дод, ки Шодихон Ҷамшед бо рафти табобати гирифторони коронавирус дар бемористони бемориҳои сироятӣ ошно шуда, “дар идома дар шӯъбаҳои табобатии беморхонаи мазкур аз аҳволи беморон, махсусан бо рафти табобати Марям Исоева, Ҳунарпешаи халқии Тоҷикистон, ки бо нишонаҳои сирояти короновирус бистарӣ гардидааст, шинос шуда, бо номбурда суҳбати озоду ошкоро анҷом дод.”
Маркази матбуоти вазорати тандурустӣ афзуд, “маълум гардид, ки барои Ҳунарпешаи халқии Тоҷикистон Марям Исоева як ҳуҷраи алоҳида ҷудо гардида, номбурда пурра зери назорати табибон, махсусан таҳти назорати профессор Раҳмонов Э. Р ва сартабиби беморхона Ҳабибзода Х.Х қарор дорад.”
“Ҳамзамон, дар рафти аёдати беморон муовини вазир бо роҳбарият ва табибони беморхона оид ба табобати босифат ва одобу муошират бо беморон, суҳбати муфид гузаронид”, гуфта мешавад бидуни шарҳи ҷузъиёт дар анҷоми иттилоияи расмии вазорати тандурустӣ.
Марям Исоева рӯзи 10 июл дар як тамоси телефонӣ ба сомонаи pressa.tj гуфта буд, дар бемористон ба парастор ниёз дорад.
“Ман хеле азият мекашам. Ҳамшираҳо сӯзандору гузаронида зуд баромада мераванд, ба ман касе нигоҳ намекунад. Илтиҷо мекунам, ки ба ман парастори алоҳида диҳанд, ки ман мемурам. Дар ин ҷо аз бетаваҷҷуҳӣ маро мекушанд”, – гуфтааст Марям Исоева.
Марям Исоева, ки 84 сол дорад, ба pressa.tj гуфт, “ман аз бемории короновирус не, аз бетаваҷҷуҳӣ азият мекашам. Гоҳо фарёд мезанам, ки касе наздам ояд, гоҳи дигар бо қошуқ ба стол мекӯбам, ки доди маро шунаванд”.
Ҳунарманди шинохта афзуд: “Илтиҷо мекунам, хоҳиши маро ба мақомот расонед, ба ман парастори алоҳида бидиҳанд. Маблағашро худам медиҳам. Фақат иҷозат диҳанд, ки маро касе нигоҳубин кунад ва ман дар бемористон, дар танҳоӣ намирам.”
Исоева Марям Неъматовна 1 майи соли 1937 дар деҳаи Сарихосори ноҳияи Балҷувон ба дунё омада, соли 9154 мактаби миёнаро дар шаҳри Душанбе ва соли 1960 курси Б.Бибиков ва О.Пижоваро дар ГИТИС, Донишкадаи давлатии санъати театрии ба номи А.В. Луначарский дар шаҳри Маскав хатм кардааст. Марям Исоева як соли аввал баъди бозгашташ аз Маскав дар театри мусиқию мазҳакавии ба номи Камол Хуҷандӣ дар шаҳри Ленинобод (ҳоло Хуҷанд) ҳунарнамоӣ карда, аз соли 1961, инак 60 сол боз дар саҳнаи театри давлатии академии драмавии ба номи А. Лоҳутӣ нақш меофарад.
Марям Исоева дар тӯли собиқаи эҷодиаш даҳҳо нақшҳои мондагор аз худ ба ҷо гузоштааст. Ӯ ба хусус дар иҷрои нақши модар дар намоишномаҳои гуногун маҳорати фавқулодда нишон додааст ва Майрам Исоеваро дар баробари Мушаррафа Қосимова Модари театри тоҷик ном мебурданд.
Хоҳари ӯ Сайрам Исоева низ ҳунарманди машҳури театру синамои тоҷик буда, тамоми умр дар театри ба номи Камоли Хуҷандӣ кор кардааст.