ВидеоУмумӣХабарҳои кӯтоҳ

НАҶОТИ МОДАРИ ДУ ФАРЗАНД ДАР ШАҲРИТӮС ВА ДУ ҒАРҚШУДА ДАР СУҒД

Кумитаи ҳолатҳои фавқулоддаи Тоҷикистон хабар дод, ки рӯзи ҷумъа, 28 май  дар кишвар се ҳодисаи ғарқ шудани одамон сабт шудааст.

Дар як ҳолат дар ҳудуди ноҳияи Шаҳритӯс модари ду фарзандро наҷот додаанд, вале дар вилояти Суғд як навраси 15-сола ва як ҷавони 19-сола ҷон бохтаанд.

Дар 5 моҳи аввали соли 2021, бино ба омори КҲФ, дар кӯлу дарёҳои Тоҷикистон дастикам 36 нафар, аз ҷумла 15 кӯдаку навраси то синни 16 ғарқ шудаанд.

Тибқи маълумоти Раёсати Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон дар вилояти Хатлон, рӯзи 28.05.2021 як сокини 26-солаи деҳаи Лубиёкори ҷамоати деҳоти Ҷӯра Назарови ноҳияи Шаҳритӯс, модари ду фарзанд ҳангоми убур аз пули деҳа ба дарёи Кофарниҳон афтодааст. Сокинони ҷамоати Тахти Сангин тавонистаанд сари вақт ба кумаки ин зан расида, ӯро аз дарё бароранд ва наҷот диҳанд. КҲФ гуфт, ба ин зан дар ҷои ҳодиса ёрии аввалини тиббӣ расонида, баъдан ӯро барои идомаи ташхиси вазъи саломатӣ ва муолиҷа ба беморхонаи ноҳиявӣ интиқол додаанд.

Ва аммо ду мавриди дигари ғарқшавии шаҳрвандон дар рӯзи 28 май чунин фарҷоми хуш надошт. Тибқи маълумоти Раёсати Кумита дар вилояти Суғд,  рӯзи 28 май, тахминан соати 15:30 наҷотдиҳандагони дастаи махсуси наҷоти шаҳри Хуҷанд ба мавзеъи Истак, ҷамоати деҳоти Ҳайдар Усмон, ҳудуди ноҳияи Бобоҷон Ғафуров сафарбар гардиданд. Бино ба хабари дарёфтӣ, як навраси 15-сола дар ҷойи барои оббозӣ мамнӯъ оббозӣ карда, баногаҳ ғарқ шудааст.

Бо роҳандозии корҳои ҷустуҷӯ ва наҷот имдодгарони бахши Раёсат дар шаҳри Хуҷанд ҷасади ӯро аз дарё берун оварданд ва ба мақомоти дахлдор таслим намуданд. 

Бегоҳии ҳамин рӯз, тахминан соати 18:00 хабари дар дарё ғарқ шудани як шаҳрванди 19-солаи сокини ҷамоати деҳоти Суҷина, деҳаи Суҷинаи шаҳри Панҷекат расид. Ӯ низ дар ҷойи мамнӯъ барои оббозӣ вориди об шудаву туғёни азим ва талотуми мавҷ ин ҷавонро ба коми дарё кашидааст. Наҷотдиҳандагони бахши Раёсат дар шаҳри Хуҷанд ҷасади ӯро аз об берун оварда, ба мақомоти ҳифзи ҳуқуқ супурдаанд.

КҲФ бори дигар аз мардум хостааст, ки танҳо дар маконҳое оббозӣ кунанд, ки иҷозат аст. “Ҷойҳои беиҷозат маъмулан хатарноканд ва метавонанд сабаби фоҷеаҳо шаванд. Ду ҳодисаи рухдода далели ин гуфтаҳост”, таъкид кардааст КҲФ.

Агар Шумо шоҳиди ҳодисаи ҷолибе шудед, видео ва акс бигиред ва бо ин шумора ба “Бомдод” фиристед. Шумораи мо (WhatsApp, Viber, IMO, Telegram): +420 777 404 854

Назари Шумо чист?

Шарҳҳое, ки дар он таҳқиру дашном ва ё иттилооти дурӯғ бошад, нашр карда намешаванд!

Back to top button