Блогер ва размандаи MMA Асҳоб Тамаеви 19-сола аз Чеченистон рӯзи 18 май набарди тан ба тани блогери 18-солаи доғистонӣ Хасбулло Магомедов, маъруф бо тахаллуси Хасбикро бо овозхони 17-солаи тоҷик Абдурозиқ баргузор мекунад. Аҷобати ин набард дар он аст, ки вазни ҳарду рақиб дар маҷмӯъ ҳамагӣ 35 килост.
Хасбик ва Абдурозиқ алакай нишасти хабарие доир карданд, ки чун анъанаи роиҷ дар байни размандагони ҷангҳои бидуни қоида қариб буд, ки бо занозании ҳарду анҷом ёбад.
Ҳаҷми ҳаққулзаҳмаи размандагон эълон нашудааст, вале қаблан маълумоте паҳн шуда буд, ки ғолиби набард 1 миллион рубл хоҳад гирифт.
Хасбик дар пайи нашри як видеое, ки қулфинай (клубника) мехӯрд, машҳур шуд. “Қулфинай, ростӣ, ин бомба аст” – ин гуфтаи Хасбик дар он видео ба мем табдил ёфта, ӯро машҳур кард.
Қади Хасбик 93 см ва вазнаш ҳамагӣ 18 килост.
Рақиби 17-солаи ӯ Абдурозиқ 1 метр қад ва ҳамагӣ 17 кило вазн дорад.
Абдурозиқ овозхони бо вуҷуди ҷавониаш дар Тоҷикистон машҳур мебошад. Клипҳои ӯ, ки асосан дар студияи «Авлод Медиа»-и рэпсарои шинохтаи тоҷик Барон (Беҳрӯз Набиев) сабт мешаванд, дар Ютуб чандин миллион тамошобин ҷамъ меоранд.
Видеои набарди Хасбик бо Абдурозиқ, тибқи нақша бояд рӯзи 18 май, соати 15 ба вақти Маскав дар YouTube-канали Асҳоб Тамаев нашр шавад.