ВидеоМуҳоҷиронҶомеа

ВИДЕО: МУҲОҶИРОНИ БАНОМУС СЕ ТИФЛИ ТОҶИКРО АЗ РУСИЯ БА НАЗДИ МОДАРАШОН ФИРИСТОДАНД

Се фарзанди Ситора Сафарова, ки қариб як сол боз дар шаҳри Новосибирски Русия дармонда буданд,  рӯзи 5 январ бо кумаки муҳоҷирони тоҷик ба Ватан, ба назди модарашон баргаштанд.

Ситора Сафарова, як модари 4 фарзанд аз Душанбе, ки ҳамроҳи кӯдаконаш ба ҷустуҷӯи кор ба Русия рафта буд, моҳи феврал ҳамроҳи кӯдаки хурдиаш ба сабаби бад шудани вазъи саломатиаш ба Тоҷикистон баргашт. Аммо се кӯдаки ӯ дар Новосибирски Русия дармонданд. 

Ситора Сафарова як моҳ қабл аз раиси шаҳри Душанбе Рустами Эмомалӣ хоста буд, ки барои баргардондани фарзандонаш кумак кунанд. Ситора мегуфт, пардохти беш аз 120 ҳазор рубл (ҳудуди 1500 доллар) барои харидани чиптаи парвози ин се тифл берун аз тавони молиявии ӯст, ки ҳатто барои кӯдаки хурдиаш имкони харидани либоси зимистонаро надорад. “Илтимосу илтиҷо дорам, ки маро ба фарзандонам расонед, чун бе онҳо зиндагӣ карда наметавонам…”- гуфта буд Ситора дар муроҷиаташ ба Рустами Эмомалӣ.

Ӯ баъди бозгашти фарзандонаш аз муҳоҷирони тоҷик, аз ҷумла аз Ҳоҷӣ Нусрат, Ҳоҷӣ Шараф ва Шералӣ ва ҳамин тавр, ба Шоҳрух Саидзода изҳори сипос кард. Фарзандони ин зан мегӯянд,  мехоҳанд таҳсили худро давом диҳанд ва дар оянда шахси маълумотдор гарданду ба оилаҳои муҳтоҷ дасти кумаки худро расонанд, то мисли инҳо дар зиндагӣ азоб накашанд. Ин зан бо кӯдаконаш ҳоло дар Душанбе дар як хобгоҳ дар шароити танг зиндагӣ доранд. Ситора мегӯяд, ба иллати маризӣ тавони кор кардан надорад ва маҷбур аст, ки бо андаке гарм шудани ҳаво бо фарзандонаш ба бозор бароянд, ки ҷуворимакка ё ягон чизи дигар фурӯхта, зиндагиашонро пеш баранд.

Муҳоҷирон аз Русия 3 фарзанди Ситораро оварданд (видео)

Pressa.tj

Пас аз гузориши сомонаи Pressa.tj се писари Ситора Сафарова, ки дар шаҳри Новосибирск бесарпаноҳ буданд, ба Тоҷикистон оварда шуданд. Онҳо дар Русия ҳам таҳсил ва ҳам кор мекарданд, аммо модарашон дар Тоҷикистон аз онҳо дур буд.

Айни ҳол фарзандони Ситора дар бари модарашон ҳастанд, вале боз дар ҳамон хобгоҳи бешароит зиндагӣ доранд. Модару фарзандон ба бародарони муҳоҷир, аз ҷумла Ҳоҷӣ Нусрат, Ҳоҷӣ Шараф ва Шералӣ изҳори миннатдорӣ мекунанд, ки ба онҳо кумак карданд ва ба Тоҷикистон оварда шуданд.

Писарони Ситора мехоҳанд дар яке аз мактабҳои русии пойтахт таҳсили худро давом диҳанд ва дар оянда шахси маълумотдор гарданду ба оилаҳои муҳтоҷ дасти кумаки худро расонанд, то мисли инҳо дар зиндагӣ азоб накашанд.

Дар поён гузориши қаблии  Pressa.tj дар бораи ин зан пешниҳоди шумо мегардад:

Маро ба фарзандонам расонед! Илтиҷои зани тоҷик аз Рустами Эмомалӣ

Pressa.tj

Ситора Сафарова дар ноҳияи Фирдавсии шаҳри Душанбе, дар як ҳуҷраи валангор бо писари ҳаштсолааш зиндагӣ мекунад. Бо вуҷуди нодорӣ, беморӣ, бекорӣ бадбахтии асосии ӯ се фарзанди ноболиғ аст, ки танҳову бемуттакко дар Русия мондаанд ва ҳар лаҳза метавонад онҳоро аз даст диҳад. Умеди ягонаи ӯ ба Раиси Маҷлиси миллии Маҷлиси Олии кишвар Рустами Эмомалӣ аст, ки ҳафтаи гузашта аз сафари Русия баргашт…

Тан ба тақдир

Ситора барои фарзандонаш ҳам падар ва ҳам модар шуда, бори зиндагиро ба дӯши худ гирифт, то ки ҷигарбандонаш дар кӯча гуруснаву ташна намонанд. Дар бозорҳои “Султони Кабир”, “Саховат”, “Корвон” ва кӯчаҳои пойтахт ба моҳӣ, ҷуворӣ ва самбӯсафурӯшӣ оғоз кард. Барои пайдо кардани қути лоямут аз саҳар то бегоҳ дар гармову сармо рост истода, аз бозорчиҳову милисаҳо гурехта, фурӯшандагӣ мекард. Маблағи пайдомекардааш ба иҷорапулӣ ва як тикка нони фарзандонаш нӯг ба нӯг мерасид. Ӯ ба тақдири сахту рӯзгори пуразобаш мегиряду месӯзад. Мегӯяд, ки баъди фавти модараш ӯро ҳатто додараш ба хона роҳ надодааст, ҳол он ки дар оила духтари ягона буд ва ба ғайр аз ду бародар дигар касе надошт.

Рӯ ба сӯи мулки ғарибӣ

Баъди чунин сахтиву ноҷуриҳои рӯзгор Ситора тасмим гирифт, ки мулки ғарибиро маскани ояндаи худ интихоб намояд. Моҳи июли соли 2019 ҳамроҳи фарзандонаш тариқи автобус ба Русия рафт. Шаҳри Новосибирскро барои зист ихтиёр намуд ва бо дастгирии муҳоҷирони тоҷик ба худ сарпаноҳе пайдо намуд. Ҳар рӯз самбӯса мепухт ва фарзандонаш онро ба бозор барои савдо мебурданд ва ҳамчунин, дар яке аз мактабҳо таҳсил мекарданд.

Рӯзҳо турнасон гузаштанду вазъи саломатии Ситора бад шуд, чун ду сол пеш дарди ҷигар, он дубора рӯ зад. Ин зани азиятдида ба ин нигоҳ накарда, боз аз пайи пайдо кардани ризқу рӯзии фарзандонаш буд. Оқибат вазъи саломатиаш хеле бад шуд ва духтурон гуфтаанд, ки бояд ҷарроҳӣ шавад. Табобат дар Русия барояш гарон афтод ва маҷбур шуд, ки ба Тоҷикистон барои табобат ояд. Моҳи феврали соли 2020 бо кумаку дастгирии ҳамватанон ҳамроҳи писари хурдиаш ба Ватан омад, то худро табобат карда, боз ба назди фарзандонаш равад.

Писаронам бесарпаноҳанд

Мутаассифона, бо сабаби бемории ҳамагири коронавирус хатсайрҳо ва роҳҳо ба Русия баста шуданд ва Ситора натавонист, ки ба назди фарзандонаш равад. Аз тангдастӣ ҳатто худро табобат карда натавонист ва шабу рӯз дар фикру хаёлаш фарзандонаш ҳастанд, ки таку танҳо чӣ кор карданд? Рӯзашонро чӣ гуна гузаронида истодаанд? Оё нони хӯрдан доранд? Маблағи иҷораашонро супорида бошанд? Таҳсилашон чӣ шуда бошад? Ва садҳо саволҳо дар сари ин зани шӯрбахт меомад ва шаби дароз гургон дилу ӯро тала мекарданд.

Ситора мегӯяд, ки бо сабаби савдо суст будан, фарзандонаш ду моҳ мешавад, ки пули иҷора (якмоҳаи он 13 000 рубл аст)-ро насупоридаанд. Ҳатто ҳуҷҷат барои иқомат надоранд ва бо ҳамон ҳуҷҷати семоҳа, ки дар рӯзҳои аввали рафтаашон карда буданд, таҳсил доранд. Муаллимони мактаб хабардор шудаанд, ки писарон баъди мактаб ба савдо машғул ҳастанд ва дар ин ҷо ягон саробон надоранд, ҳушдор додаанд, ки агар модаратон омада шуморо нигоҳубин накунад, ба хона-интернат месупорематон.

Ба ном шавҳар доштам

“Аз рӯзе, ки бо падари фарзандонам оиладор шудам, рӯзи хушро надидам. Мардвор бори зиндагиро мекашидам ва ба ном шавҳар доштам, ки ҳатто фарзандонам аз ӯ меҳри падариро надидаанд. Падар шуда тӯли 8 соли охир боре барои фарзандонаш ним халта орд наовардааст, либоси мактабӣ нахаридааст ва парво надорад, ки оилаву фарзанд дорад ё не. Баъди моро партофтан ба ягон фарзандам алимент надодааст, боре 400 сомонӣ ба дасти муфаттиш дода гуфтааст, ки инро бурда деҳ, заҳри баданашон шавад. Аз бешавҳариву дар ба дарӣ азоби сагро кашидам, ки худам медонаму болои сарам Худованди бузург”,-мегӯяд Ситораи бетақдир.

Қарзи бонк ва фиреби зани маккор

Соли 2014 дастони писари хурдии Ситора сӯхт ва ӯ ба маблағ сахт эҳтиёҷ дошт. Аз содагиву камбағалиаш Шокирова Ҳилола ном зан, ки дар ошёнаи чоруми хобгоҳ зиндагӣ дошт, истифода бурда, ба номи Ситора аз “Агроинвестбонк” 3 ҳазору 700 доллар қарз гирифтааст. Пеш аз қарзгирӣ барояш 500 сомонӣ дода, ӯро фиреб додааст. Рӯзе ҳамроҳаш Ситораро ба “Агроинвестбонк” бурда, гуфтааст, ки дар вақти қарзгирӣ гап назан, ман ҳамаашро ҳал мекунам. Ду-се корманди бонк ҳамаи ҳуҷҷатҳоро пур кардаанд ва баъди гирифтани маблағ Ҳилола гуфтааст: -Вақте қарзҳоямро баргардондам, ин масъаларо дар 3-4 моҳ ҳал мекунам, хавотир нашав. Бо ҳамин Ҳилола ғайб задаасту дигар аз ӯ дар ягон ҷо ному нишон пайдо накарданд… 

Оча, ба Русия биёед

Фарзандони Ситора дар синфи 7, 5 ва 2 мехонанд ва мегӯянд, ки оча худатон ба назди мо биёед, чун дар Душанбе хонаву дар надорем, азоб мекашем. Агар мо равем, боз кӯча ба кӯча савдо карда мегардем ва аз мактаб ҳам дур мемонем. Дар ин ҷо ҳеҷ набошад, бе ягон мушкилӣ як бурида нони худро ёфта хӯрда метавонем. Ҳамон хобгоҳу дашномшунавӣ аз мардум диламонро гирифтааст. Оча, як илоҷ карда, ба назди мо оед…

Рустами Эмомалӣ маро ба фарзандонам расонед

Айни замон ин зани сиёҳбахт намедонад, ки сари худро ба куҷо занад, дар назди кӣ гардан каҷ намояд, то барояш кумак кунанд. Муҳтоҷи ҳама гардидааст. Нон барои хӯрдан надорад, мадори роҳ гаштан низ, чун асаб ва фикри фарзандони роҳдураш ӯро аз пой афтонда истодааст. Писараш дар яке аз мактабҳои пойтахт таҳсил дорад, лек Ситора ҳатто имкон надорад, ки барои ӯ либоси зимистона харад.

Ситора мегӯяд, ки умеди ягонааш Раиси шаҳри Душанбе муҳтарам Рустами Эмомалӣ аст, ки ҳафтаи гузашта аз сафари бобарори Русия баргашт: “Илтимосу илтиҷо дорам, ки маро ба фарзандонам расонед, чун бе онҳо зиндагӣ карда наметавонам…”-мегӯяд ӯ.

Бахтовар Сафаров

Агар Шумо шоҳиди ҳодисаи ҷолибе шудед, видео ва акс бигиред ва бо ин шумора ба “Бомдод” фиристед. Шумораи мо (WhatsApp, Viber, IMO, Telegram): +420 777 404 854

Назари Шумо чист?

Шарҳҳое, ки дар он таҳқиру дашном ва ё иттилооти дурӯғ бошад, нашр карда намешаванд!

Back to top button