НАХУСТИН АКСИ ТИФЛОНИ ПАНҶГОНИК. ОНҲОРО ҲАСАН, ҲУСЕЙН, ФОТИМА, ЗУҲРО ВА ХАДИҶА НОМ ГУЗОШТААНД
Раиси вилояти Хатлон Қурбон Ҳакимзода рӯзи 1 январ барои табрики хонаводае, ки дар арафаи соли нав соҳиби панҷгоник шуд, ба деҳаи Б.Ғафурови ноҳияи Қубодиён рафтааст. Бобои тифлони панҷгоник Мамат Бобоев ба раиси вилоят хабар додааст, ки тифлонро Ҳасан, Ҳусейн, Фотима, Зуҳро ва Хадиҷа ном гузоштаанд. Қурбон Ҳакимзода дастур додааст, то манзили ин хонаводаи хушбахтро навсозӣ карда, барои тифлони панҷгоник ҳуҷраҳои иловагӣ бисозанд.
Дилноза Мамадова, сокини 31-солаи Қубодиён, ки ду фарзанд дошт, рӯзи 30 декабр панҷгоник – ду писар ва се духтар – ба дунё овард. Ҳоло ӯ ҳамроҳи тифлони навзодаш дар таваллудхонаи ҷумҳуриявӣ дар Душанбе таҳти назорати табибон қарор дорад. Тифлони панҷгоник аз якуним то ду кило вазн дошта, табибон вазъи онҳо ва модарашонро хуб арзёбӣ мекунанд.
Хадамоти матбуоти ҳукумати вилояти Хатлон гуфт, Дилноза Мамадова дар хонаи шавҳараш ҳамроҳи падари шавҳараш – Бобоев Мамат, нафақахӯри 76-сола ва модари шавҳараш Нормуродова Норбӣ, нафақахӯри 74-сола зиндагӣ мекунад. Шавҳараш (Нормуродов) Бобоев Бароти 41-сола муваққатан бекор буда, то замони паҳншавии бемории сироятии нави коронавирус ва эълон шудани пандемия ба муҳоҷирати корӣ ба Русия сафар мекард. Мамат Бобоев зимни суҳбат бо раиси вилоят гуфт, ки се фарзанди дигараш низ кӯдакони дугоник доранд.
Қаблан дар Тоҷикистон чанд мавриди таваллуди сегонику чоргоник мушоҳида шуда буд, вале панҷгоник бори аввал ба дунё омад.
Носирҷон Маъмурзода
Ба тифлони панҷгоник, ки ду рӯз қабл таваллуд ёфтаанд, Ҳасан, Ҳусейн, Фотима, Зуҳро ва Хатича ном гузоштаанд.
Ин хабарро имрӯз, 1 январ, Мамат Бобоев, бобои тифлони навзод, зимни суҳбат бо раиси вилояти Хатлон Қурбон Ҳакимзода, ки барои муборакбодӣ ба хонадони онҳо дар деҳаи ба номи Бобоҷон Ғафурови ноҳияи Қубодиён ташриф овард, расонид.
Раиси вилоят ба ин оила туҳфаҳои пулию молӣ ва ғизоии мақомоти иҷроияи ҳокимияти давлатии вилояти Хатлонро расонида, аз аҳволи модару фарзандон пурсон шуд.
Айни ҳол модари тифлони панҷгоник Дилноза Мамадоваи 31-сола, ки сокини ноҳияи Қубодиёни вилояти Хатлон аст, бо кӯдакони навзодаш дар таваллудхонаи ҷумҳуриявии шаҳри Душанбе таҳти муроқибати табибон қарор дошта, вазъашон хуб арзёбӣ мешавад.
Таваллуди якбора панҷ тифл бори нахуст дар вилояти Хатлон ба қайд гирифта шудааст.
Дилноза Мамадова соли 2008 бо сокини деҳаи Бобоҷон Ғафурови Ҷамоати деҳоти “20-солагии Истиқлол” Барот Бобоев (Нормуротов) оила барпо намуда, аз зиндагии якҷоя соли 2010 соҳиби як духтар – Нормуротова Фирӯза ва соли 2017 соҳиби як писар – Нормуротов Иброҳим шудаанд.
Соли 2020 табибони ноҳия баъди ташхис муайян менамоянд, ки дар батни Д. Мамадова 5 тифл ба вуҷуд омадааст ва барои нигоҳубин ва таҳти назорат қарор додан ба таваллудхонаи ҷумҳуриявии шаҳри Душанбе роҳхат медиҳанд.
Рӯзи 30 декабри соли 2020 Дилноза Мамадова 5 фарзанд – ду писар ва се духтар ба дунё меорад.
Д.Мамадова дар хонаи шавҳараш ҳамроҳи падари шавҳараш – Бобоев Мамат, нафақахӯри 76-сола ва модари шавҳараш Нормуродова Норбӣ, нафақахӯри 74-сола зиндагӣ мекунад. Шавҳараш (Нормуродов) Бобоев Бароти 41-сола муваққатан бекор буда, то замони паҳншавии бемории сироятии нави коронавирус ва эълон шудани пандемия ба муҳоҷирати корӣ ба Русия сафар мекард.
Замини наздиҳавлигии онҳо 0,16 га-ро ташкил дода, 0,14 га замини ёрирасон (президентӣ) доранд.
Мамат Бобоев зимни суҳбат бо раиси вилоят гуфт, ки се фарзанди дигараш низ кӯдакони дугоник доранд. Ҳамакнун шумораи наберагони дугонику панҷгоникаш ба 13 нафар баробар шудааст.
Раиси вилоят Қурбон Ҳакимзода ба масъулон дастур доданд, ки дар азнавсозии манзили истиқоматии тифлони панҷгоник ва бунёди ҳуҷраҳои иловагии муносиб барои тифлони навзод мусоидат намуда, пас аз ба Қубодиён овардани онҳо, навзодон зери назорати ҳамарӯзаи табибон қарор бигиранд.
Шуъбаи иттилоотию таҳлилии
дастгоҳи раиси вилояти Хатлон