Ду ҳодисаи кордзанӣ дар Исфара ва калтакборон дар ноҳияи Ҷомӣ
ВКД Тоҷикистон дар бораи ду ҳодисаи қасдан расонидани зарари вазнин ба саломатӣ хабар дод. Аз ҷумла як сокини 49-солаи қаблан судшудаи шаҳраки Шӯроб шаби 13 декабр, соати 22 дар ҳудуди шаҳраки Навобод ба шиками як сокини 34-солаи Навобод ду корд задааст. Ҳамин тавр, сокини 26-солаи деҳаи Сурхоби ноҳияи А.Ҷомӣ соати яки шаби 1 декабр, дар саҳни ҳавлиаш як ҳамдеҳаи 62-солаашро бо калтак латтукӯб кардааст. Ба зидди ҳарду бар асоси қисми якуми моддаи 110-уми Кодекси ҷиноятӣ парванда кушодаанд.
Рух додани 2 ҳодисаи қасдан расонидани зарари вазнин ба саломатӣ
Маркази матбуоти ВКД Тоҷикистон
Ҳангоми гузаронидани чорабиниҳои оперативӣ-ҷустуҷӯӣ аз ҷониби кормандони милитсия марди 49-солаи сокини шаҳраки Шӯроби шаҳри Исфара, ки пеш бо моддаи 227 қисми 2 Кодекси ҷиноятии Ҷумҳурии Тоҷикистон (нашри соли 1961) суд шудааст, ҳамчун гумонбар дар қасдан расонидани зарари вазнин ба саломатӣ, дастгир карда шуд.
Номбурда, санаи 13-уми декабри соли 2020, тахминан соати 22:00, дар ҳудуди шаҳраки Навободи ҳамин шаҳр аз сабаби муноқишаи ба миён омада бо марди 34-солаи сокини шаҳраки мазкур бо корди кисагӣ 2 маротиба ба шиками ӯ задааст.
Дар натиҷа, ҷабрдида ҷароҳати вазнини ҷисмонӣ бардошта, дар беморхона бистарӣ гардидааст.
Нисбати гумонбаршаванда парвандаи ҷиноятӣ бо моддаи 110 қисми 1 Кодекси ҷиноятии Ҷумҳурии Тоҷикистон оғоз карда шуда, тафтишот идома дорад.
Ҳангоми гузаронидани чорабиниҳои оперативӣ-ҷустуҷӯӣ марди 26-солаи сокини деҳаи Сурхоби ноҳияи А.Ҷомӣ бо гумони қасдан расонидани зарари вазнин ба саломатӣ дастгир карда шуд.
Номбурда, шаби 30-юми ноябр ба 1 декабри соли 2020, тахминан соати 01:00, дар саҳни ҳавлии истиқоматиаш бо марди 62-солаи ҳамдеҳааш аз сабаби муноқишаи ба миён омада, ҷангу ҷанҷол карда, бо калтак якчанд маротиба ба узвҳои баданаш задааст.
Дар натиҷа, марди 62-сола ҷароҳати вазнини ҷисмонӣ бар-дошта, дар беморхона бистарӣ гардидааст.
Нисбати номбурда парвандаи ҷиноятӣ бо моддаи 110 қисми 1 Кодекси ҷиноятии Ҷумҳурии Тоҷикистон оғоз гардида, тафтишот идома дорад.